Cincuenta y dos aña pasa, pa ta exacto dia 2 di juni 1969, un grupo di Rubiano a haya nan enfrenta cu algo cu nunca nan lo a biba pensa. Na momento cu nan a scoge pa drenta Scol di Polis, nan no a spera nunca di a bira parti di historia di un fecha marca pa semper.
Elio Dania, ex sub-inspector di polis, a conta con 53 aña pasa, e cu un grupo di cuidadano a sali for di Aruba cu e prome vuelo di ALM direccion Corsou, cu e meta di bira polis. Tabata trata di diesun persona for di nos isla cu despues a forma un klas hunto cu seis persona mas di nos isla ruman Corsou. E klas aki a bira parti di e historia y a ricibi e nomber klas 30 di mei, como cu tabata e prome klas cu a drenta despues di e dicho fecha.
Na momento cu e grupo a yega Corsou e tabata un sopresa pa hopi, mirando cu a pensa cu ningun hende lo aplica, como cu tabata net dos dia despues di e lantamento y a pensa cu lo a afecta e desicion ey. Al contrario, tur a presenta tanto di Aruba como di Corsou.
Tin di corda cu opleiding di polis e tempo ey tabata na Corsou, cualkier hoben di e islanan cu tabatin e deseo di forma parti di e Cuepro di Polis, mester a solicita y prepara pa biaha pasobra tur preparacion tabata tuma luga na Corsou.
Entre nan por corda Ronaldo ‘Ronny’ Bernadina cu a solicita pa bira polis sin avisa su mayornan. E tempo ey su mayornan lo a biaha pa un tempo basta largo pa salud y tabata den exterior pa por lo menos seis luna y esey tabata momento cu Ronny a probecha y a inscribi. Pa su sorpresa y esun di su mayornan, a presenta e tempo ey polis Raak qepd dilanti port’i cas, e diabierna ey di 30 di mei pa duna di conoce cu e ta entre tur e otro aspirantenan cu lo tin cu biaha pa Corsou pa drenta scol. E momento ey su mayornan a haya sa cu e tin cu biaha y cu nan a bin busc’e cu pasashi den man caba.
E grupo a biaha y a transporta nan pa Rio Canario e mainta ey, caminda e scol tabata situa. A topa aki cu e grupo di Corsou cu a forma e klas di 30 di mei. E grupo e tempo ey tabata keda un of dos den un camber y tabata cana bay direccion scol cu no tabata mucho leu for di eybanda.
Kico a tuma luga na momento cu a yega
E grupo nobo aki a yega net pa e lantamento. Entre nan tabatin tres of mas cu a bin di militaire dienst cu a haci cu nan mester a presenta pa reenforsa e cuerpo di polis mesora. Nan a haya e uniform cu por a haya. A pidi nan haci nan areglo na e uniform y presenta pa subi caya di biaha.
Elio Dania di su banda ta conta cu nan cu tabata nobo y cu no a bin di un background militar mester a permanece na scol mirando cu e disturbio tabata uno sin presedente. Pa nan mes un siguridad tabata pidi nan keda paden mas cu ta posibel. E tempo ey tambe a intruduci un Toque de Queda (TDQ) na Corsou y pa 6:00 pm nan tur tabata paden manera tabata pidi.
Riba caya tabata chaos, tur cu tabata polis mester presenta pa subi caya. Incluyendo e tempo ey e polisnan cu tabata duna les na e aspirantenan cu a haci cu scol (Opleiding) no por a cuminsa casi pa un luna largo.
Lio Capriles, voorzitter van de Kamer van Koophandel na 1969 a describi e lantamento aki como: “E aña 1969, semper lo keda marká den nos historia komo e aña mas difísil, mas yen di pena, pero tòg e aña di mas importante ku nunka nos a krusa”.
“Un otro gòlpi masha duru, – i no laga niun hende onderschat e daño aki, – ta nos ‘public image’. Hopi estranhero, pero tambe hendenan local, a disidí di drop plannan pa negoshi nobo ku nan a planiá, i asina a kita chèns di mas trabou i mas entrada pa nos isla i su habitantenan”.
Elio Dania a menciona e nombernan cu a forma e klas di 30 di mei, cu tabata: Jossy Tromp, Chong Thijssen (RIP), Pedro Valentein, Chepito Kelly, Rufo Solognier, Ceril “Cheche” Bronswinkel, Elio Dania, Ro Bikker, Ronny Bernadina, Oi van den Biezen, Leo Ras, entra nan tambe esunnan di Corsou Alberg, Thode, Henriquez, Emerenciana, Martina y Offerman.
