Redaccion di 24ora.com a combersa cu un cabayero cu ta haci e negoshi di transferencia, kende ta Joshua Senchi. E kier a haci denuncia contra un agente policial kende e ta haya a haci abuso di su poder.
Senchi a conta nos cu e ta haci transferencia di placa pa Venezuela, cual akinan ta un negoshi hopi reconoci.
E agente policial aki, a yama Senchi algun luna pasa pa e haci un transferencia pa un famia na Venezuela. Den e transferencia aki tabata tin un intermedario, cu ta contacta su famia pa haci’e pe. Senchi a bay Shaba y retira e placa. El a entrega e placa na su hendenan na Venezuela, kendenan a haci’e. Te asina leu, tur cos tabata cla cu su transferencia. Senchi no a haya ningun reclamo di parti di Bernardus te cu awo. Despues di dos luna cu a contacta Senchi via otro persona, supuestamente pa e bay Shaba pa un otro deposito, cu e pensamento cu tur cos a bay bon. Sin embargo algo a bay robes.
Na Shaba, Senchi ta bisa, el a haya un sorpresa, ora cu e polis Bernardus, den uniform, a reclam’e pa su placa, te dos luna despues di e transferencia. E polis a hinca man den su saco y a bay cu por lo menos 290 florin. Fuera di esey el a bay cu su dos telefonnan y tambe e yabi di auto, cual Senchi a fia.
“Aki ta mustra claramente cu e polis a haci abuso di e posicion cu e tabata tin y atende algo personal, den uniform, cual sinceramente no ta algo na su luga.”
Senchi a bisa cu e kier a evita pa e polis bay cu e auto, sin embargo, e no a logra. E mester a cana di Noord te cu Playa.
Senchi a menciona cu e polis a reclama pa 150 florin, sinembargo el a bay cu tur placa cu Senchi tabata tin riba dje. E ta para riba cu tur loke el a haci, ta corecto. E no kier a bay mas leu di haci e denuncia aki, pero e no a mira otro remedio.
Loke e ciudadano a agrega tambe, cu un tempo pasa, el a perde su telefon, pero despues el a hay’e bek. El a perde su cierto informacionnan. Y e polis a keda insisti cu Senchi a bloki’e, cual Senchi a indica cu no ta berdad.
Pa loke ta e auto, Senchi a lagoe para dilanti Shaba. Supuestamente a bay cu e auto na warda di Balashi, pero Senchi no sa kico a pasa cu e vehiculo.
El a bisa cu e ta bay tuma pasonan. Diahuebs mainta e tin cita na warda di polis y lo bay mira kico ta bay pasa. Senchi a menciona cu si autoridad trata pueblo asina, ta kico ta di pueblo mes. Mester actua riba e hecho aki urgentemente. Senchi tin hopi hende ta transfer cun’e. Den e negoshi aki, bo ta haya hende bon y bo ta haya hende malo. E tin hopi hende cu por para p’e y bisa cu e ta serio den su negoshi.
“Awo e pregunta ta keda, dicon awo ta bin reclama despues di dos luna.” Apesar cu el a perde su telefon, toch na final di cuenta, el a haya e number bek. Si a keda yam’e e lo a responde.
E polis a paga su mes, mirando cu ta el a hinca man den su saco y bay cu su placa y ainda un tiki mas.
“E polis en cuestion, ta haci uzo di poder como agente uniforma, pa atende su asuntonan personal.”
