Tabata e aña aki cu mando policial a mira e importancia cu mester bin cu estudio policial pa polisnan canino, conoci como e unidad di K9. Hunto cu docentenan di Scol di Polis E.J. Watty Vos, instructor di K9 Vianney Coffie a prepara un estudio profesional riba nivel internacional. Cu estudio aki ta habri porta cu Aruba tin su mesun instructor y keurmeester pa por entrena y prepara cualkier polis cu su K9 local, den region of internacionalmente.
Despues di seis luna di trabou duro, planifiacion, entrenamento y estudio intensivo di K9, Cuerpo Policial Aruba ta orguyoso di anuncia cu tin dos polis cu nan K9 Notorius y Dax cu a pasa e examen exitosamente y cu ta cla pa subi caya.
Ta trata aki di agente policial A. Leonard y D. de Castro cu canino Notorius y Dax cu ta di e rasa di Mechelse Herder. Pa prome biaha Polis tin dos canino “dual purpose” cu tin e tarea pa busca obheto y arma di candela. Cu e dos agentenan y caninonan nobo aki, e unidad di K9 polis ta sigui crece.
Na Field di Cobra na Savaneta a haci entregamento di certificado den presencia di Ministro di Husticia, Rocco Tjon, Comisario Trudy Hassell y Hefe di Scol di Polis E.J. Watty Vos, mr. drs. Jeanette Richardson-Baars na e keurmeesters, e dos agente policial A. Leonard y D. de Castro cu nan canino Notorius y Dax y tambe a huramenta un colega nobo cu ta J. Lopez Atari.
“Nos ta asina orguyoso di e unidad di K9 polis, mirando e dedicacion, amor profesionalismo y mas aun nan a demostra cu nan ta domina e tereno aki hopi bon y alabes nan a bin pa keda”, tabata palabranan di Trudy Hassel, comisario di Cuerpo Policial Aruba.
Invitadonan a presencia e demostracion di e unidad nobo di K9 di polis. Aruba por ta orguyoso di tin un team dedica y ta profesionalmente cla pa cualkier eventualidad.
