Na Sabana Basora polis a confisca un auto marca Nissan modelo March. E agentenan a topa e auto riba caminda cu un of mas persona aden cu cara tapa. Nan a lora bay bek pa nan. E Nissan March a core bay laga polis.
Asina mes polis a topa e auto para su so den Sabana Basora. Esunnan den e auto e momento ey a baha caba y mengua nan mes meymey di grupo di hende cu tabata den Sabana Basora. Polis a pidi refuerso y baha puntra ken tabata cu e Nissan March.
Ningun di esunnan presente kier a bisa ken tabata cu e auto. A resulta cu e auto aki ta mesun cu algun dia pasa patras di Botica Oduber a topa cuater hoben aden cu droga. E dia ey a detene tur hiba warda. Polis no a lubida e auto. A manda busca e cacho di polis diahuebs anochi pa presenta na Sabana Basora.
A controla e auto completo. No a topa e mascaradanan y no sa kico tabata nan intencion. Tampoco a haya droga of arma. A tuma nota cu e auto no tin su documentonan na ordo. Mirando cu ningun hende presente kier a responsabilisa nan mes pa e auto, a pone cu a confisca e auto. A hib’e warda pendiente investigacion y tambe pa esunnan responsabel presenta pa busca su drechi.
