Fundacion CINEARUBA su festival di cine ta cla pa start diahuebs awor.
E prome anochi di Playa Film Festival ta habri cu e exposicion di 30 aña di Pardo su carera den media. Despues lo sigui cu un seleccion di pelicula interesante manera e pelicula di Ida Does titula New Light – The Rijksmuseum and Slavery, Rasha di Melissa Strangio, The Last Resource di Kaylee Reeberg y Juan David Villar.
Diabierna, diasabra y diadomingo e festival lo inicia pa 2:00 di merdia cu diferente masterclass y tayer pa mucha (7 pa 12 aña) entre otro masterlass di Script Breakdown, Production Schedule, Film Language y Formula Filmmaking. E tayernan pa mucha ta consisti di Foley Sound Effect, Play Doh Stop Motion y Green Screen Acting. Durante dia y anochi lo tin diferente peliculanan local y di otro paisnan manera Merca, Hulanda, Inglatera, China, Brasil y Corsou.
Diadomingo lo cera cu e anochi di ceremonia di premio unda lo saca e ganadonan di premio publico pa pelicula largo y cortico. Pa e programa detaya di tur e actividad- y peliculanan por bishita www.playafilmfestival.com.
E festival di cine di Playa ta posibel danki na e sosten di Prins Bernhard Cultuurfonds Caribisch Gebied, Aeropuerto Internacional Reina Beatrix, VNO, Cede Aruba, Setar y Smart & Fast Cargo. Tur e actividadnan lo tuma luga na Ateliers ’89 na Dominicanessenstraat 34, situa net schuin tegenover di Maria College Mavo.
