Diahuebs anochi Ateliers’89 tabatin nan Magnify Mural Expo. E tayer aki tabata bou guia di e artista Armando Goedgedrag. Un total di diesseis persona a participa n’e tayer aki, di cual diescinco di nan a mustra nan arte pinta riba mural.
Armando Goedgedrag, artista y instructor, a splica cu nan tabatin diesseis participante, cual tabata hopi. Den un tempo di cuater siman nan a logra traha e mural. Pa dos siman nan a traha paden y despues dos siman pafo.
E cos mas importante tabata cu nan kier a bin cu diseño chikito, sea a mira algo riba papel of telefon, y nan kier a bin cu algo grandi. Goedgedrag a indica cu su persona a percura pa siña e participantenan e metodo con pa haci esey.
E participantenan tabata Juliana Arismendy, Shandra Vrolijk, Aldrich Kelly, Jesus Viroh, Dimanche Jolie, Julie Wever, Shadee Romero, Juan Hoek, Suyin Ridderstaat, Marianne Beijderwellen, Joa Beke, Nini Quist, Yanith Daniela Velasco Alzate, Nicole Villada Rivera, Nohemy Habibe y Natascha de la Fuente.
E biaha aki Ateliers’89 a scoge pa haci e exhibicion pafo y no den e cura manera nan ta haci normalmente. Segun e artista, nan a scoge e topico di naturalesa, flor y fauna, y hopi di nan tabata tin miedo pa pinta riba muraya ya cu esaki tabata nan prome bes. Tabata maraviyoso pa mira con sorprendi nan a keda di loke nan por.
Shandra Vrolijk, participante, a indica cu e tayer tabata di Armando Goedgedrag y esaki tabata su prome bes di pinta un mural. Esaki ta prome bes cu el a purba algo asina aki y pinta algo realistico. E estilo aki tabata algo completamente nobo pa Vrolijk y el a keda encanta cu e experencia aki. Tur hende tabata conecta cu otro y Armando a yuda nan hopi bon.
Vrolijk a scoge pa pinta un lora. E idea tabata cu nan a purba un par di cos durante les, pero Vrolijk a namora di e potret di lora. Loke el a siña no solamente con pa haci nan idea bira un realidad, pinta algo chikito pa uno mas grandi. Goedgedrag a siña nan tecnica, por ehempel con pa pinta pluma , cara, wowo, palo. Incluso a siña nan con pa traha cu verf, e materialnan. Goedgedrag a comparti cu e participantenan casi tur su secretonan.
Pa mas lesa TREMPAN.COM.
