E homber aki su nomber ta Stephen Wilson. Coriendo auto bou influencia y cu velocidad hopi halto a dal den un auto di direccion contrario diadomingo den Sero Colorado. Den e auto cu el a dal den dje tabata tin adulto, mucha y baby. Dos adulto a fayece y tambe un baby di dos aña.
Tin ainda mucha cu fractura serio interna den hospital. Un di e adultonan tabatin algun luna na estado y tabatin un baby completo forma den bariga. Stephen Wilson tabata bayendo trabou. Den un caso caminda bo ta causa desgracia fatal y ta bebi, semper bo ta keda deteni. Den e proceso aki e cos a cana otro. El a bay hospital y aunke a test positivo pa alcohol, no a deten’e.
Si deten’e mester pone polis cuid’e na porta di su camber pa e no haya bishita. E maneho di e gobierno aki ta corta den overtime di polis. Kier pa tur ambtenaar traha cierto cantidad di ora y tuma timeback. Logicamente e scarcedad di polis no ta permiti pa corta den overtime. Mirando e maneho di gobierno ta pone un presion grandi riba e cuerpo policial. A resulta cu no tin polis pa cuida Stephen Wilson si nan deten’e.
Fuente den Cuerpo Policial a confirma cu lo persigui Stephen Wilson, pero e ta liber te awo. Si no tin suficiente polis pa subi caya, logicamente no tin polis pa bay vigila Stephen Wilson na Hospital si deten’e pa stuur auto bou influencia y mata tres ser humano den un accidente. Esaki ta e maneho cu awe nos mester biba cu ne.
E ta un dolor pero no por otro. E speransa ta si nan laga Stephen Wilson bay cas, pa detene asina cu e sali di hospital y hib’e warda pa asina e sinta castigo pa loke el a comete. Pa un maneho di overtime y falta di polis, un homber cu a mata tres ser humano den un accidente hamas por ta cana liber. Na Aruba y den shelo tur cos por.
E realidad ta cu e mester bin duna cuenta na corte pa e accidente. Pero den pueblo e sentimento ta cu e no por cana liber sin mas despues di causa e desgracia aki.
