Pensionadonan cu a custuma cu e anochi prome cu dia di cobra por cuminsa lanta cen for di mashin di ATM, a topa cu sorpresa. Mas grandi e sorpresa a bira awe diabierna mainta cu a yega banco y a tende cu SVb no a pasa placa di pensioen pa e pensionadonan ainda. “Ta un eror interno”, asina ir. Edwin Jacobs a confirma na nos.
Riba website di SVb ta pone tur fecha den e aña aki cu ta paga pensioen di viehes. E luna aki e fecha ta fiha na 30 di augustus. Pero, e empleado na SVb tin den su mente cu e fecha ta dialuna dia 2 di september 2019. Consecuentemente a manda e ordo di pago lat ayera.
Cu tur e pensionadonan purbando pa cobra awe, a pidi banco cooperacion pa pasa e transferencianan mas lihe posibel. “Tur hende lo cobra awe ainda. Mi ta kere cu pa 10:00am tur cuenta di nos pensionadonan mester ta credita caba”, asina Edwin Jacobs a sigura.
