For di Refineria di Aruba (RdA NV) y Fuels Marketing & Supply Aruba (FMSA) nos a compronde cu e compania ta atendiendo un demanda miyonario for di abogado mr. Hendrik Croes. E ultimo aki ta purba cobra 1 miyon florin for di FMSA, pa su ruman Rudy Croes cu a tuma maneho over di CITGO Station Savaneta. Manera ta conoci, RdA ta resorta bou di Minister di Energia, esta mr. Evelyn Wever-Croes, e mesun yiu di abogado Hendrik Croes y sobrina di Rudy Croes. Den Hunta di Supervision ta sinta su mesun primo Junior Croes mientras cu su otro primo Maikito Croes tambe tin un rol awor den RdA. Un problema di famia cu diferente actor sinta na ambos banda di mesa di negosacion. Algo ta bisa cu di integridad no por tin nada den un situacion semehante asina aki!
Cu e tipo di retonan asina riba mesa y cu un Director cu no kier coopera pa saca placa pa famia di e estado aki, di mes ta compronde awor dicon tanto esfuerso y empeño pa purba descredita Alvin Koolman y e directiva di e compania. Mester busca tur forma pa alcansa un crusada pa lag’e bay, pa por cumpli cu deseo di famia, relaciona cu e stacion di gasolin na Savaneta. Mo Aiky a pasa e operacion over pa su ruman Rudy Croes, cu di otro banda ta consehero di Minister Presidente y Minister di Husticia den e Gabinete aki.
CITGO Savaneta
Pa hopi decada Aiky Croes a maneha e stacion di gasolin na Savaneta. E realidad ta cu e stacion no ta di dje, sino di FMSA, pero e tin un contract pa e oper’e pa nan. E contract e tin’e bou su nomber personal. Despues di hopi aña den operacion di e stacion, pa motibo di edad y retonan di salud, el a propone na FMSA pa traspasa e operacion over na su ruman homber Rudy Croes. E ultimo aki a keda cu e mesun contract, esta pa opera e stacion den nomber di FMSA. Esey ta nifica cu FMSA mes ta haci tur inversion relaciona cu maneho di e stacion. Pero pa haci e asunto mas formal, na november 2017 a lanta Family Croes Service Center VBA cu Rudy Croes hunto cu su casa Damia Croes-Arends como Director.
Celebracion den guera!
Na momento cu a traspasa e stacion di Aiky pa Rudy Croes, a opta pa FMSA haci un agasajo pa gradici Aiky Coes pa tur e añanan di lealtad y di operacion di e stacion na Savaneta. E evento a tuma luga den Kowloon Restaurant y a bay compaña cu entregamento di plakkaat di reconocimento, etc. Den e ambiente amical aki a termina e evento cu abraso entre FMSA y famia Croes. Sinembargo, ora cu e director di RdA a yega su oficina, el a haya un bunita carta di abogado Hendrik Croes demandando e compania pa un suma di 1 miyon florin. Aiky Croes kier sali di e negoshi cu un cuenta na banco di por lo menos 6 cifra.
Tanki ta lek
Di acuerdo cu e demanda di Hendrik Croes na RdA/FMSA, e tanki di combustibel na CITGO Savaneta tin un lek. Con grandi e lek ta, cuanto combustibel a bay perdi y cuanto placa e compania a perde, no ta conoci y no ta hustifica tampoco den e demanda. RdA a contesta mesora cu mester un hustificacion y cu prueba di perdida di entrada prome cu haci un semehante demanda asina, cu no ta presupuesta ni ta teni na cuenta den e cifranan di e compania. A dura lunas prome cu por a manda un contesta, di e compania tecnico ACE cu a estima cu un buraco lo por nifica un perdida di 2200 florin pa dia. No ta prueba cu tin un buraco asina den e tanki ni for di ki tempo e ta lek, pa por cuantifica e suma.
FMSA a start su mesun investigacion
Pa e compania nacional di distribucion di combustibel na Aruba, ta importante pa reglanan di bon gobernacion prevalece den nan maneho. Asina a laga un otro compania cuminsa cu un investigacion tecnico na e stacion. A pidi cifranan di e stacion di gasolin y despues di casi dos aña ainda no por haya esakinan pa prueba cuanto gasolin FMSA a yena den e tanki y cuanto a bende, pa por demostra cu tin un deficit di producto. Tur stacion ta controla e tanki por lo menos dos biaha pa dia y mester nota e “standing” di gasolin y diesel den e tanki. Cu no por prueba esaki ainda, ta haci e demanda mas cuestionabel.
Rudy Croes kier cumpra e stacion di gasolin
Oficialmente Rudy Croes, cu awor tin su mesun compania VBA, a mustra interes pa cumpra e stacion na Savaneta for di FMSA. Ta un procedura normal y cu a yega di sosode mas biaha. Por ehempel famia Arends cu ta maneha esun den Caya Betico Croes tambe a solicita pa cumpra e stacion for di FMSA. Locual ta haci ta un balorisacion dor di un compania di accountant profesional y presente na Hunta di Supervision. Den e caso aki e ta un asunto delicado pasobra miembronan di e Hunta di Supervision ta sea famia of amigo di cas of tabata den Hunta di Supervision di BBA Bank di Hendrik Croes.
Conflicto di interes?
Cu omo di Prome Minister ta maneha un stacion di gasolin, no ta su culpa. Esaki pasobra e omo tabata haci esaki for di hopi mas prome cu e sobrina a dicidi di drenta arena politico. Pero cu e problema aki ta presenta net ora e sobrina ta Prome Minister y encarga directamente cu e compania RdA y FMSA ta haci e reto mas serio. Pero….cu ta permiti pa Bo mesun tata sirbi como abogado y consehero di RdA/FMSA den e asunto di contract cu CITGO/PDVSA y na mes momento e ta demandando e compania pa un suma miyonario, ta algo cu Orden di Abogado normalmente no ta permiti! Evelyn Wever a hinca famia den e compania aki y awor un problema di famia a bira un problema di RdA/FMSA y ta zona na un conflicto di interes enorme memey di tata, omo, yiu, sobrinonan, etc.
Tocante FMSA
Benta di combustibel na Aruba ta data desde decadanan atras, for di tempo di Refineria Lago. Cu tempo a separa e trabaonan di refina petroleo for di e compra y benta di gasolin, diesel y jetfuel na comunidad. Despues di Lago e compania a sigui bou di e nomber di Esso Petrolera te ora cu Coastal Refinery a tuma e refineria over. E tempo ey, na aña 1995, a yama e compania Coastal Aruba Fuels Company (CAFCO) y desde aña 2009, despues cu Valero a tuma e Refineria over, a yama e compania Valero Marketing & Fuels Supply Aruba (VMSA). Desde dia 1 di october 2016 a bin cambio atrobe y awor e compania yama Fuels Marketing & Supply Aruba, FMSA y su unico doño ta Refineria di Aruba. E compania ta conta cu un flota di 13 truck grandi cu ta transporta combustibel pa e stacionnan situa tur rond Aruba, mientras nan tin 6 truck mas chikito cu ta opera na Aeropuerto, unda nan ta bende jetfuel cu e avionnan. Na tur FMSA ta conta cu mas o menos 40 empleado, bon prepara y capacita pa maneha mas o menos 200 miyon liter di combustibel pa aña. Desde 1 di october 2016 nan operacion a bira mas grandi ainda, awor cu FMSA ta encarga pa bende “Fuel Oil” cu WEB.
