Secretario di Estado Raymond Knops a papia hopi awe di confiansa cu e no tin den Gobierno di Aruba. Bisando esey, a palabra awe cu pa dia 20 di september proximo lo tuma un decision di e pasonan cu Hulanda lo tuma pa por garantisa supervision financiero riba nos pais, asina Minister Plenipotenciario Guilfred Besaril a vocifera na salida for di e reunion na Den Haag. “E no tabata un reunion facil”, segun e representante di Gobierno di Aruba durante e reunion.
Segun Minister Besaril, e cifranan di Aruba ta mustrando avancenan interesante. IMF y Standard & Poors tabatin elogio pa Aruba y a “rate” nos economia como positivo. Cifranan di impuesto ta raporta hasta un surplus na mita di aña. Pero, pa Hulanda e palabra confiansa ta escencial.
“Aruba tin Status Aparte, ta lucha pa para riba su mesun pianan pa bay dilanti, awel awo ta ora pa demostra”, tabata splicacion di Minister Plenipotenciario na Hulanda.
El a keda di papia awo cu Gobierno di Aruba riba e realidad politico pa cu Gobierno di Reino y pa hunto analisa e pasonan cu nos mester tuma pa por gana e confiansa bek den Gobierno di Hulanda. Parce cu e cambio di e ley di LAft den Parlamento di Aruba, minando e poder di CAft pa cu supervision financiero a bira e motibo principal di e impasse awo.
