For di na inisio di e gobernashon aki, partido PIN a duna di konosé di no ta konfia e forma ku negosashon nan tabata tuma lugá di parti Guangdong Zhenrong Energy (GZE).
Futuro di Kòrsou, trahadónan den refineria di Kòrsou, mama i tatanan di famia i ekonomia di Kòrsou, tur tabata pendiente di e negosashon. Hopi rabiamentu tabata tin entre yunan di Kòrsou i asta desesperashon pa futuro. PIN komo un partido inovativo i responsabel ku ta para pa òrdu i speransa, a tuma nota ku e forma di proseder di Guangdong Zhenrong no tabata transparente. Nan no tabata ke un “due dillegince (kontrol huridiko i finasiero) di nan kompania. Inkluso na un okashon ku nan a hasi un presentashon na parlamento di Kòrsou , na lugá di a splika e plan kon ta bai pone nos refineria funshoná, nan a splika un plan kon nan ta bai dominá hinter waaigat i asina dominá un area ekonómiko importante di Kòrsou. Loke GZE no a splika e dia ei, ta kon nan ta garantisá ku e plan ta kristalisá i ku nan por manehá e refinería eksitosamente. PIN for di e tempu ei no a haña responsabel pa hinka un parti grandi di ekonomia den man di un (1) kompania so. Mester repartí riesgo riba mas kompania i desaroyá den fase. E promé fase ku a negoshá ku Guandong Zhenrong Energy no a kana bon siendo ku kabinete Whiteman no a eksigí un kontrol hurídiko finansiero riba e GZE.
Notabel ta ku tin algun nòmber di ex ministernan ku ta zona den tantu HNO komo Guandong Zhenrong. Inkluso nos ta kòrda ku algun polítiko supuestamente di taya a rabia masha pisa ora e gobièrnu aktual a finalisá tur negosashon ku Guandong Zhenrong pa motibu di nan intransparensia. E seriedat pa tuma desishonnan pa futuro di Kòrsou a laga hopi di deseá serka algun mandatario ku tabata sinta riba e stul na inisio di e proyekto. Tumando desishonnan deskabeyá pa Kòrsou, no a demostrá un aktitut di responsabilidat serka mandatarionan kual pueblo a hinka konfiansa den nan man pa medio di elekshon. Falta di atendé responsabel ku futuro di pueblo a hera di kosta nos hubentut su futuro. Por poko hubentut a haña hipotek, debenan i claim riba su futuro di tal forma ku nunka mas hubentut di Kòrsou lo por a hala rosea trankil.
