Awe mainta Dr. Horacio E. Oduber Hospitaal a yega na un acuerdo cu Andries Roelof Jonkhoff, un internista-hematologo y oncologo, relaciona cu su carta di retiro for di hospital. Tabata obvio cu dado momento e relacion di trabou entre e specialista y Hospital no tabata bon mas, cu a conduci cu e dokter a manda un remitido den prensa contra su doño di trabou. Asina mes varios pashent a mustra sosten pa e specialista, cu peticion pa e reconsidera su posicion tuma. Awe a laga e carta pa pasado y a acorda cu ta sigui cu e mesun relacion di trabou.
Mester bisa cu siman pasa e specialista a kita for di trabou. Den e proceso, el a bishita Minister di Salud Publico y hasta Minister Presidente, pa splica e motibonan dicon e kier bandona e funcion. Gobierno a scucha e banda di medaya di Hospital tambe den e disputa cu a presenta. Un ke otro a conduci na un reunion urgente entre AZV y Hospital na Hyatt Regency siman pasa. Mester bisa cu despues di esey ainda tabatin negociacion, den cual partidonan a acorda cu e Dokter lo traha 6 luna mas pa “werk in” un otro specialista y cu despues e lo bandona e trabou.
Dr. Jonkhoff a cuminsa traha na Aruba desde 1 di juli 2011. Den su acuerdo di trabou cu Hospital, e mester duna e fundacion 6 luna di tempo prome cu e kita di trabou. E periodo por ta mas cortico, dependiendo si haya un reemplasante mas lihe pa e funcion. Sinembargo, den e caso aki partidonan a acorda cu ta kibra e relacion di trabou entrante dia 1 di november 2018 y cu no mas tarda cu 11 di januari 2019 lo a paga e specialista un suma di no menos cu Afl. 100.776,= den su man. Prome cu esey, den luna di november lo a paga e specialista tur otro derecho cu e tin, por ehempel dianan di vakantie cu e no a tuma, etc. Riba dje ainda e lo haya 14 mil florin cu e tin derecho riba dje pa bay un curso den exterior, cu e no a haci ainda.
Interesante ta cu e tabata cla pa firma un acuerdo cu Hospital den cual partidonan lo abstene di duna informacion of comentario na prensa tocante e acuerdo aki. Asina mes, e acuerdo a “lek” di un banda, pa cual ta conoci awor cu e Specialista no kier djis kita bay, sino kier a bay cu un “golden handshake” tambe.
Pero, tur cos a cambia awe mainta ora cu a sinta na mesa atrobe cu Hospital y aki a acorda cu e ta “trek in” su carta di retiro y cu e lo sigui traha normal atrobe pa e fundacion, respetando e reglanan di Hospital como su doño di trabou. Kico a conduci cu el a cambia di opinion no ta conoci, pasobra Hospital di otro banda a informa for di e siman aki caba cu tabatin dos reemplasante caba den su luga como Oncologo.
