Frakshon di Movementu Futuro Kòrsou (MFK), a tuma nota di desaroyonan negativo na Giro Bank i tambe Ennia Caribe, dos entidat ku konforme leinan ta preskribí ta kai bou di supervishon di Centrale Bank van Curaçao en Sint Maarten (CBCS) di kua Kòrsou ta pa 72% e akshonista mas grandi den Banko Sentral
Bou di komunidat i e klientela ku tin relashon finansiero ku un di e dos entidatnan aki ta biba un preokupashon enorme pa loke ta trata nan interesnan finansiero na tantu Giro Bank i Ennia Caribe.
Frakshon di MFK den e último 5 añanan a pidi diferente reunion tantu públiko i tambe di komishon sentral pa a trata e manera kon CBCS tabata funshoná i kon e supervishon di CBCS tabata ser ehekutá riba entidatnan finansiero pero Gobiernu i Presidente di Staten semper a stroba esakinan di tuma lugá usando diferente preteksto, i awe mira e konsekuensianan grave.
Meskos tambe frakshon di MFK den karta fecha 28 di yüli 2015, nos a pidi un reunion públiko pa trata e siguiente tópiko, ku e petishon aki tampoko no a wòrdu honra, usando komo argumento ku e tópiko tabata ta subjudice den korte;
“Froude mionario den Giro Bank N.V., supervishon inefisiente di Banko Sentral den Giro Bank i tambe proseder di Banko Sentral den Giro Bank N.V. miéntras e banko ta bou di kuratela for di Desèmber 2013 mirando ku Giro Bank ta Huisbankier di Gobièrnu di Kòrsou i maneho general di e kartera di finansa dor di sr. Jose Jardim”.
Ta di lamentá ku awe dos entidat ku ta kai bou di supervishon di CBCS ta den problema finansiero serio i ta papia di aktonan froudulento i hustamente e ròl di supervishon di CBCS ku no a detektá òf tabata partísipe di krea e situashon aktual den Ennia i Giro.
Si a honra frakshon di MFK su petishon pa e diferente reunionnan pidi manera Reglamentu di Orden ta bisa, kisas awe e klientenan di Giro Bank i Ennia lo no a haña nan mes konfrontá ku e preimu marga ku awe nan lo tin ku chupa ya ku e maneho hiba den e dos kompanianan aki tabata pa saka fluho di kapital efektivo remplasando esakinan ku otro “dekking” ménos fuerte.
Ta pa e motibunan ariba menshoná i mirando ku hopi klientenan di tur e kompanianan aki alabes pueblo di Kòrsou mester por haña klaridat riba lokual ku a sosodé i ta sosodiendo, Frakshon di MFK konforme artíkulo 33 di nos Reglamentu di Orden ke pa yama un reunion di Komishon Sentral URGENTE kaminda primeramente Minister di finansa sr. Gijsbertha i gerensia di CBCS lo mester ta presente pa duna Parlamento informashon di lokual ku ta pasando relashoná ku supervishon di CBCS riba tur e dos entidatnan aki miéntras tur e akshonnan straño a tuma lugá den Giro Bank i Ennia Caribe. Tambe mester trese klaridat riba e konsekuensia di a frakasá di supervisá korektamente i ku konsekuensia awe na e konsumidó final ku ta awor víktima di akshon robes den Giro Bank i Ennia ku aprobashon di Banko Sentral.
Durante di e reunion aki Parlamento lo kier skucha tambe gerensia i komisariado di Giro Bank ku tabata “huisbankier” di Gobiernu. Asina klientenan i pueblo por sa ta kiko i kon grandi e embergadura di e problema na Giro ta i kua ta e perspektivanan pa nan kada un su posishon personal pa ku e relashon ku e banko.
Tambe Parlamento lo kier skucha gerensia i tambe komisariado di Ennia Caribe pa informá pueblo di Kòrsou eksaktamente lokual ku a sosodé den e kompania ku fondonan sólido ku a sali for di den e kompania, ku outorisashon di Banko Sentral, ku tabata para komo bòrg nan tur e portafolionan di seguro ku persona nan i kompanianan tin sigurá na Ennia Caribe
Frakshon di MFK ta spera ku presidente di Parlamento lo no kometé e mesun eror grave di keda sin yama e reunion aki ku URGENSIA i invitá Minister di Finansa, gerensia di CBCS, gerensia i komisariado di Giro Bank i Ennia pa asina Parlamento por skucha i debatí ku nan riba e situashon penoso ku nan a krea den nos komunidat ku lo por tin konsekuensianan ireparabel pa hopi persona.
