FTA constantemente ta haya toch miembro nobo y ta haci preparacion tambe di nan representantenan cu mester atende cu kisas negociacion, combersacionnan, interes, scucha miembronan na diferente empresa. Presidente di FTA, Hubert Dirksz ta splica cu na momento cu un compania of trahadonan di un compania dicidi pa bira miembro di FTA, nan mester tin nan representante cu ta wordo yama un delegado of un shopsteward. E persona eynan logicamente mester cera conoci cu FTA y e tin cu pasa den un proceso di formacion. E tin cu participa den cursonan pa conoce FTA, conoce kico ta sindicalismo, conoce con e sociedad ta hinca den otro, na unda e rol di e sindicato ta y asina eynan ta conoce tambe tur e procesonan cu ta tuma luga den un organisacion, di kico sindicato ta biba. Sindicato mester mantene e programanan di formacion. E mester tin e parti di informacion, comunicacion. E mester ta bon organisa pa atende cu tur su asuntonan, tur e obhetivonan cu e tin pa logra. E tin cu tene cuenta cu na prome luga cu e situacion di e trahado, e calidad di bida. E situacion sigur na pia di trabao cu e tin un bon trato, bon salario, bon condicion y bon representa, cu su problemanan ta wordo atendi realmente. E shopsteward ta na pia di trabao, ta e sindicato. Esey ta para riba y ta insisti y tin den acuerdonan den contractonan colectivo cu e shopsteward tin un tempo, un cantidad di dia pa aña cu e por participa na cursonan. Tambe tin manera cu un miembro bira un shopsteward pa prome biaha, e ta participa den un training y te hasta e ta yega na un nivel, na uno basico, despues nivel intermedio y despues superios, y despues specialisacion, cual ta wordo haci mas tanto den exterior, den combinacion cu Universidad di trahadonan di America Latina, cu ta situa na Panama, pero cu docentenan di varios Universidad y sindicato den e region. E intencion ta, pa traha mas cerca conhuntamente cu institutonan di formacion na Aruba y pafo, pa asina ey duna e calidad, e nivel necesario pa e shopsteward eynan funciona miho posibel y pa e por ta un bon dirigente den e sindicato y den e sociedad cu e por aporta pa entre otro di loke a wordo menciona, pa e situacion social di e trahado, pero tambe su parti financiero. E sindicato mester ta prepara, pa e mantene su mes y asina ey tin continuidad.
