Den un entrevista anterior, Kathy Paskel, directora di Dimas ta splica cu e afwijzingspercentage ta na 12% di e total di peticionnan cu tin aden. Cu e 12% porciento aki, e ta splica cu normalmente Dimas ta fluctua entre 6 y 9 porciento pa aña. Awor aki e ta riba 12%. E ta 3% mas halto compara cu e añanan anterior. Por ta door di mas control esaki ta asina.
Demanda di Venezuela
Te cu ultimo cu Dimas a monitor, compara cu e añanan anterior, ta mira un subida leve di peticionnan regular di permiso. Loke si a subi ta estadia turistico. Esey di parti di Venezuela ta comparativamente halto. Pero ta pidi pa tur prome peticion cu nan tin cu cumpli cu un carta di conducta pa e ciudadanonan di Venezuela, e ta conta tambe cu nan tin cu bin cun’e na ordo y apostilla. Si nan no por cumpli cu e parti di regla aki, e permiso di nan lo wordo nenga.
Evaluacion di prome permiso
Ainda e prome permiso ta wordo tuma den tramite. Claro cu e tin cu cumpli cu e rekisitonan. Tin diferente tipo di permiso. Tin di studiante, rentenier, arbeid, pa famia. Na momento di arbeid y no ta un empleado domestico, e lo tin su trayecto cu e lo mester bin cu un positivo di parti di DPL pa por tramit’e, si e no cay den un excepcion di loke e minister di labor ta haci. Tin prome peticion cu ta wordo tuma. Den tur tipo di categoria.
Mercado laboral
Na momento cu e ta aplica pa un extencion di estadia turistico, hopi biaha ta un famia ta firma p’e. Casi 98% di e peticionnan cu Dimas ta haya, no ta e turista cu ta keda na un hotel. Ta e turista cu ta pidi pa keda cerca un familiar y ta haya normalmente entre 1 y 30 dia na imigracion y e ta pidi pa extende esey. Cu nan ta subi mercado laboral, esey Guarda nos Costa cu ta haci controlnan periodicamente na diferente empresa, ta topa e turista ta traha. Esey por ta un chens grandi cu nan ta mal uza e tipo di estadia aki pa otro meta, pero un hende cu haya un estadia turistico, e ta bao di limitacion cu e no mag di traha. E ta pa e keda como turista na Aruba. E cifranan ta halto, y ultimo cu a wak e grupo di Venezuela ta e grupo di mas grandi cu ta pidiendo pa extension. Dimas por nenga tambe diferente di e peticionnan. Nan ta haci cierto control.
