Awe a topa cu un grupo di persona den Village partiendo comestibles. Ta trata di un grupo di personalidanan conoci di comunidad, kendenan a tuma e iniciativa pa busca donacion y parti esaki den diferente bario.
“Awe nos ta yuda nan y mañan kisas ta ami mester di ayudo,” e personalidad di Carnaval Lienthci Merryweather, kende tabata forma parti di e grupo a comenta.
El a splica cu nan a sinta y den tres dia a dicidi di haci algo y asina a cuminsa pidi donacionnan, mas tanto producto pa mucha ya cu pa esaki tabatin hopi demanda.
A manda 50 chat pa hende cu nan conoce, tanto personanan individual como comerciantenan y asina a haya productonan special pa muchanan manera juice, baby food, pampers, lechi, etc. Asina a logra yega na casi 300 macuto.
A busca informacion y a dicidi di cuminsa duna ayudo na dos barionan di Village y De Vuyst y den e siguiente ta bay na otro barionan. Su conseho ta pa cada persona cu por adopta un famia den e temponan dificil aki.
