Dialuna mainta a cuminsa cu un caso serio na Pos Chikito, unda a destrui un vehiculo y tabatin un herido. Ta situacion ta hopi tenso y polisnan ta pensa cu e situacion lo por escala cualkier momento.
E hecho aki a sosode rond di 9’or di mainta. Por a scucha hopi alarma den e bario di tanto Polis como Ambulance cu a yega na e compleho di casnan prefab cu ta keda den bisindario di Pos Chikito panort. Informacion acumula ta mustra cu tabatin un pelea cu hincamento.
Pero esnan cu a bin busca problema a huy rapidamente for di e sitio, apesar cu e Polisnan a yega hopi lihe.
Paramediconan a trata e victima di e pelea den ambulance, mientras e Polis tabata ocupa ta tumando dato di e sucedido. E victima no tabata tin mester di bay hospital y por a keda cas. Polis a conseha e victima pa bay ImSan toch pa nan mira e herida y e haya e papelnan necesario cu nan a atende, pa su dokter di cas.
Segun e victima ta un problema di un par di tempo caba, unda algun persona hoben den e bario a haya falta di un valve cover di nan Toyota Yaris. Nan a saca nan conclusion cu un amigo di e victima, cu tambe tin un Toyota Yaris, lo a horta e piesa aki, esta e valve cover.
E problema a cuminsa escala te cu ayera un grupo a bin yobe e cas cu baranca, siendo cu tin e Yaris no ta biba eynan. Awe e grupo a bolbe bin na e cas y aki e persona a dicidi di bay riba nan y a cuminsa bringa cu nan te cu un glas di nan Toyota a resulta kibra. Den tur esey un di e contrincantenan tabata tin un schroefdraaier plat y a bay riba doño di cas cu e arma blanco. E homber a haya un hinca net na su braza, pero ta parce cu e no tabata un hinca profundo.
E doño mes no kier mas problema debi cu e tin 2 yiu chikito, pero a laga sa cu si nan bin ataca su persona na su cas, e lo sali defende su mes y su famia. E guy problematico y su adres ta conoci pa Polis.
