Diahuebs mainta algo prome cu 7:00, un auto a alcansa un peaton na e rotonde di Sero Patrishi. Di biaha unidad di Polis y ambulance a bay na e sitio.
E pickup marca Nissan tabata bini for di Playa y yegando e rotonde, segun e chauffeur pa via di e solo scerpi no a mira cu net na e momento un persona tabata crusando e zebrapad. Aunke e chauffeur di e pickup no tabata bin duro, e no por a hala mas y a dal e peaton. E impacto a pone cu e peaton masculine a dal prome riba e hood di pickup y despues a cay riba caminda.
Un señora Hulandes cu backup medico y ta di vakantie na Aruba, a mira e accidente tuma luga. Di biaha el bay brinda su yudansa na e peaton. E persona tabata keha di basta dolor na su lomba. Na yegada di ambulance, e paramediconan a tuma over y a hiba e persona herida pa Hospital. Polis a tuma tur dato di pa asina traha nan raport. Algun persona presente tabata remarca cu e zebrapad na e rotonde ta un peligro, pasobra autonan hopi biaha ta baha y subi rotonde cu hopi speed. Den parti mainta e solo ta blind e chauffeurnan di tal manera cu ta dificil pa mira si tin hende ta crusa nan dilanti.
