Esunnan cu tin e necesidad di cuido medico y no por cubri e eigen bijdrage, AZV no tin un plan pa nan. En cambio Gobierno a informa nan cu posiblemente lo introduci un zorgtoeslag. A papia riba esaki den e comision cu AZV ta forma parti di dje. E comision ta preocupa con ta bay organisa esaki y unda ta bay saca e fondonan pa cubri’e.
Solange Tchong, Relacionista Publico di AZV, a bisa cu mester ta realistico pasobra si di un banda ta corta for di e fondo di AZV, for di unda ta bay busca presupuesto pa cubri esaki. Gobierno a informa AZV riba esey cu nan ta bezig cu e organisacion di un zorgtoeslag pa yuda personanan cu ta cay den e grupo di no por cubri eigen bijdrage of cierto cambionan cu ta na caminda.
Segun Tchong, si no ta pa nan, no lo bay den e situacion aki, p’esey nan no por haci hopi cos. Loke e situacion di Coronavirus a causa, a pone cu Gobierno mester a tuma cierto decisionnan manera bin cu Shelter in Place. Esey a pone cu na cierto momento Aruba su economia no a draai di forma cu por a cubri e fondo di AZV. E ta un situacion fastioso, pero no tin nada otro pa haci di cumpli cu e instruccionnan ricibi. AZV kier pa Aruba ta na prome luga pa recupera y p’esey ta cumpli cu e instruccion.
AZV a hay’e ta traha bou presion, di cual nan a ricibi e instruccion dia 18 di mei y mester a traha e proposicion di plan den 1 siman y mey. Nan ta cla pa ranca sali, pero e informacionnan no por sali tanten cu Parlamento no tuma un decision. Aworaki ta para den e fase di introduci aporte propio na cierto servicio medico.
Nan ta cla pa ranca sali pa duna e informacionnan, pasobra nan ta depende aworaki di Gobierno di Aruba pa tuma e decisionnan necesario pa haci e cambionan den ley. AZV a saca varios comunicado pa splica kico ta nan proposicion, esta e five way model. Entrante 1 di juli a introduci algun di e instrumentonan caba, pero awo ta papiando riba tur cu falta cual Gobierno a pone fecha y a informa AZV riba esaki. Nan a pone e fecha di 1 di augustus, pero esaki por pasa mas laat. AZV ta consciente cu mas esaki tarda, mas conscecuencia esaki tin pa nan finansas.