E bos di Hesus ta Su palabra cual ta e Evangelio. P’esey Hesus a bisa den Juan capitulo 10:27 y 28: “Mi carnenan ta tende Mi bos y Mi conoce nan y nan ta sigui Mi. Mi ta duna nan bida eterno y nan lo no muri nunca y ningun hende lo no ranca nan for di Mi man.”
Ta hopi hende ta scucha awendia bos di e malvado y bos di caya y drenta mal caminda.
Pero nos mester haci tur locual ta posibel pa nos alcansa scucha e bos di Dios y asina cana den Su caminda.
Nos por scucha bos di Dios ora nos ta pone E na prome luga den nos bida. E ta papia directamente cu nos curason. Nos por scucha di Señor ora nos ta lesa su palabra y tambe Dios tin e poder pa uza un persona pa trece un palabra pa nos. (2 Reynan Capitulo 20:1- 6).
Pasobra awendia e sistema di mundo ta purba di tur manera di aleha hende for di Dios, p’asina hende no scucha di Dios y cay den trampa di e enemigo.
No lubida cu den Juan 10:10 e palabra ta bisa cu e ladron ta bin pa horta, mata y destrui. Pero Cristo Hesus a bin pa duna bida abundante.
Cuanto hende awendia no ta den problema, pa locual cu nan a scucha of locual cu nan a lesa y desvia nan totalmente for di e caminda di Dios.
Ta altamente necesario pa como mayor bo siña bo yiunan pa scucha e bos di Dios den tur cos. Consulta cu Dios prome cu bo haci algo. Warda riba Señor su contesta. Tene pasenshi. Mantene respet y temor pa Señor.
Siña bo yiunan lesa Bijbel y medita den e palabra di Dios.
Siña bo yiunan haci oracion cu gradicimento na Dios.
Siña bo yiunan cu e caminda di Dios ta e caminda berdadero, di amor y pordon y cu Dios nunca ta bandona ni desampara su yiunan.
Ta cosnan masha importante pa abo como mayor siña bo yiunan, pasobra nos kier pa nos yiunan ta bon na altura di cosnan moderno. Pero con nos ta deal cu Dios, con nos ta haci comunica cu Señor.
No lubida cu ta imposibel comunica cu Dios papiando via di telefon of internet.
Corda bon cu Señor ta bisa cu su carnenan conoce Su bos. Pa bo conoce Su bos bo mester tin relacion diario cu Dios y esey ta sosode durante bo oracion.
Oracion no ta solamente pidi so, pero tin momento pa bo scucha tambe, pasobra Dios ta gusta papia cu su carnenan.
No tin nada mas bunita ora nos yiunan por trece nan peticion dilanti di Dios. Un tin nada mas grandi ora bo yiu por haci oracion pa bo for di un edad chikito.
E tempo pa siña mucha con ta bebe y huma y droga a pasa. Ta tempo pa siña tur mucha conoce e bos di Dios.
