Nos ta casi un aña leu di e proximo eleccion parlamentario y ya ta mira cu diferente politico a cuminsa campaña. Por lo menos esunnan den gobierno, esta di partido MEP y RAIZ a cuminsa gaba cu proyecto, claro, esey ta un señal cla cu “campaña a start.” Por lo menos den MEP ta mira schuifmento y cantidad di hende cu lo y ta keda afo. Por ehempel, nan colega Guillfred Besaril (sospecho di husticia) y Chris Romero (sospechoso di husticia) ya caba no a aparece mas rib’e lista den ultimo eleccion. Y asina tin ocho mas cu no lo sigui cu MEP.
Recientemente durante un programa via internet, Dangui Oduber den un forma masha habri a indica cu el a cuminsa riba lista di MEP como candidato #6 djey a bay pa candidato #4 y ultimo eleccion a yega te na candidato #3, el a comenta: “do the math”, pues indirectamente indicando cu e lo sigui crece y posiblemente lo yega te na candidato number #2 rib’e lista.
Ey cos ta sinta, mirando cu actualmente, Xiomara Maduro ta candidato number #2 pero ultimo eleccion el a ricibi apenas 1883 voto cu ta significa un caida di 30% den voto compara cu e eleccion anterior.
Di otro banda, Dangui Oduber como candidato number #3 a ricibi 2060 voto, pues un number mas abou cu Maduro pero asina mes a haya mucho mas voto cu ne. Claro, esey no ta laga afo cu e popularidad di Dangui Oduber tambe a bira menos, mirando cu el cay cu 14% den voto compara cu eleccion 2017, pues ambos a bay atras.
