Heart-Centered Leadership Foundation (HCLF) ta entre e 10 candidatonan di Caribe Hulandes cu por gana un prestigioso ‘Appeltje van Oranje’. E tema di e aña aki ta ‘lucha hunto contra soledad’ y a selecciona HCLF su iniciativa ‘Heart-Centered Impact Coaches’ como un di e candidatonan. Esaki ta e di dos biaha den dos aña cu HCLF lo forma parti di Appeltje van Oranje despues cu na 2022 a yega te na e ronda final.
Appeltje van Oranje ta un premiacion anual cu ta reconoce iniciativanan den Reino Hulandes cu ta haci un diferencia den comunidad. Tur aña ta reconoce y premia 3 iniciativa den e area social cu ta creativo y unico, cu ta para pa inclusividad y un sociedad involucra.
E tema di e aña aki ta pone enfasis riba iniciativanan cu ta traha hunto pa combati soledad. HCLF su iniciativa Heart-Centered Impact Coaches ta entre e candidatonan cu a destaca pa nan esfuerso pa combati soledad entre hobennan. E grupo di ‘coach’ ta consisti di hobennan adulto boluntario entre 18 y 30 aña cu ta sigui un trayecto di training y asina ta sostene hobennan durante diferente actividad interactivo di HCLF.
E fase di hubentud no ta uno facil. Un hoben ta topa hopi retonan den su crecemento cu ta stroba su formacion completo den un adulto autentico, para firme den su sapato y cu ta participa den sociedad. Un di e retonan ta cu hasta si e tin un grupo grandi di amistad, un hoben por sintie completamente su so. E sentimento di soledad por causa retonan cu salud mental. Pa e hoben cu ta sintie solitario, sin niun hende pa conecta, e coachnan ta duna nan atencion y un horea pa scucha sin cu ta husga nan.
Loading…
Reload document
Open in new tab E diferencia di e iniciativa ta e conexion cu e Heart-Centered Impact Coaches ta crea cu hobennan y pa nan mes como hoben adulto. Cu hobennan, nan ta percura pa un espacio sigur pa expresion propio y un ambiente inclusivo pa sostene otro. Pa nan mes como hoben adulto, nan ta conoce otro boluntario cu ta comparti mesun proposito of meta, forma conexion, intercambia experiencia y oportunidad y motiva otro pa ta e miho version di nan mes. Un ehempel di nan motivacion y conexion ta con nan ta bin cu actividad pa hoben y pa nan mes, manera un ‘mindfulness hike’ y un sesion di crecemento personal pa hoben.
Heart-Centered Impact Coaches tabata presente den mas di 30 sesionnan pa hoben, yudando HCLF alcansa 400 hoben cu su programanan den aña 2023. Den e prome 4 lunanan di 2024, e Heart-Centered Impact Coaches ya a conecta cu hoben durante 20 sesion.
HCLF ta entusiasma cu su iniciativa ta considera pa e premio di Appeltje van Oranje. E ta un reconocemento di e trabao valioso cu e fundacion y su Heart-Centered Impact Coaches ta haci pa combati soledad entre hobennan. HCLF ta confia cu e trabao cu su Heart-Centered Impact Coaches ta haci ta yuda crea un comunidad mas conecta y inclusivo, caminda cu cada hoben ta sinti su mes valioso y empodera.
HCLF ta haci un yamada na pueblo di Aruba pa keda pendiente pa e ronda di votacion cu lo tuma luga di 22 pa 31 di mei proximo, unda HCLF tin e chens pa sigui pa e ronda di 10 nominadonan cu por gana un Appeltje van Oranje. E tres ganadonan ta ricibi un estatua brons chikito diseña door di Prinses Beatrix y tambe un premio cash na balor di €25,000. Reina Maxima lo otorga door di Reina Maxima na Paleis Noordeinde na Hulanda.
Pa vota por click akinan: https://stem.oranjefonds.nl/heartcenteredimpactcoaches
Tocante HCLF:
Heart-Centered Leadership Foundation (HCLF) ta un fundacion cu a keda estableci na 2008 cu e meta pa inspira y empodera e hobennan di Aruba. Desde 2012 e fundacion ta ofrece diferente tayer, actividad y seminario unda hobennan ta haya oportunidad pa desaroya nan caracter y habilidadnan cu ta fortifica nan desaroyo personal y profesional.
