Dialuna 13 di Mei a trata e ley di Kiesverordening den Parlamento di Aruba. E ley tabata contene dos cambio riba e privacidad di e ciudadanonan, door di minimalisa e informacion riba e kiesregister. Adicionalmente a introduci cambionan den e area di ICT. E dia a bay hopi interesante mirando cu un total di cuater amienda a wordo entrega: 3 di Miguel Mansur y 1 di AVP, cu kier a wak cambionan haci riba e ley.
Amienda di AVP
Den e betoog di Mike Eman mesora a cuminsa hunga politica cu e ley pa trata na sembra duda y discordia den pueblo. Mike Eman a ataca Electorale Raad y e huesnan pasobra el a perde dos asiento den e ultimo eleccion y no por a biba cu esey. Mike Eman a presenta un amienda cu lo mester trece cambio den e periodo cu ta warda e stembiljetnan despues di eleccion. E amienda a haya simpatia di fraccionnan den Parlamento, incluyendo esun di coalicion.
Amienda di AVP mester conseho di RVA
Prome cu a vota riba e amienda, un gran mayoria di Parlamentario a expresa di lo kier mira un conseho di Raad van Advies riba dje. Mirando cu ta un cambio grandi riba e ley, Parlamento tabata di acuerdo pa fraccion di AVP haci esaki, sinembargo sin interumpi e proceso di e ley actual. Esaki no a cay den bon tera cerca e fraccion di AVP. Sinembargo mester bisa si cu den AVP su weganan politico semper a pusha y a pone enfasis riba consehonan duna di Raad van Advies, y awo bo mes no kier busca esaki pa bo propio amienda?
AVP por a traha un ley di iniciativa for di 2021
E realidad ta, cu si di berdad AVP kier a wak un cambio den e Kiesverordening, nan no tabata mester a warda te ora gobierno a bin Parlamento cu e ley. E pregunta ta, kico lo a sucede si gobierno nunca a bin Parlamento pa cambia e ley di Kiesverordening? Probablemente hamas AVP lo a introduci e amienda y grita na Censo atrobe. Kico por tabata AVP su opcionnan?
· AVP por a traha un ley di iniciativa pa cambia e Kiesverordening, dicon nan no a haci nada?
· AVP tabata tin tres aña di tempo pa introduci un ley nobo, dicon nan no a haci nada?
· AVP tabata tin tres aña pa busca conseho di Raad van Advies riba nan concepto di ley nobo, dicon nan no a haci nada?
Esaki nos ta yama oportunismo politico, shonnan. Bo kier cambio den e ley pero bo no ta busca un conseho di Raad van Advies. Bo kier cambionan den e ley pero bo no ta haci nada pa tres aña largo. Semper bo ta exigi tur cos ora gobierno ta bin cu un ley y bo mes no ta haci bo huiswerk!
AVP ta uza e ley pa distrai atencion di Caso Avestruz
Tur cos ta indica cu Mike Eman ta usando e ley di Kiesverordening pa desvia atencion di caso Avestruz. Mientras Benny ta para dilanti mesa berde Mike Eman ta dilanti Censo. Casualidad of otro wega politico mas? Tres aña largo bo por a haci algo y b’a keda sordo, mudo y inactivo y awo bo ta gritando dilanti Censo?
