Patio 15 ta conoci pa tin un ambiente sumamente cozy, ameno den su parti dilanti, caminda bo por disfruta di tapas compaña di bon musica y sin lubida e staff servicial cu ta para cla pa yuda. Pero diasabra awo lo ta diferente. Patio 15 lo presenta un concepto nobo cu yama ‘Dine, Hits & Fun’. Esey ta nifica cu tanten bo ta disfruta di bo dinner, lo tin un banda cu yama ‘Hits & Fun’, cu lo presenta un variedad grandi di exito, sea ta clasico, internacional, musica contemporaneo, y asina nos por keda menciona.
Y abo ta invita pa bin disfruta di e concepto nobo aki. Pa solamente un anochi, e parti patras di Patio 15 lo ta transforma pa bo ‘have fun’.
E patio patras lo bay ta diferente, caminda cu e ambiente lo cambia y bira uno mas di fiesta. E idea ta pa bo sinta y disfruta di bo cena, di bo bebida y alabes bo ta disfruta di ‘Hits & Fun’, hunto cu Buddy Love, Joshue, Dwight Leoneta y e conocido cantante Rocco.
Representante di e prestigioso distribuidor di e biña Bread and Butter, cu ta Cava Wine & Spirits, a conta di e escogencia pa e dia aki. E ta un producto di hopi fama na California. E ta un biña di Napa, unda cu pa e cena lo bin cu cuater tipo, cual ta Pinot Noir, Cabernet Sauvingnon, Chardonnay Blanc y un Rose.
Manera tur bon biña di California, Bread and Butter ta bin un bon sabor y super dushi cu pasta. Cava Wine & Spirits, fuera di bin cu biña, nan ta bin cu mas tipo di bebida, manera Rum Diplomatico. Na Aruba nan ta aporta na e crecemento di nan marca. Nan ta bende e marcanan cu nan ta kere den dje, marcanan cu nan ta bebe y ta disfruta.
Experto di Cava Wine and Spirits, Nelson, a splica cu e biña por combina bon cu pasta y naturalmente cu tur cos. Biña ta bon pa comparti y Patio 15 ta bon pa comparti y disfruta. P’esey ta trece diferente producto, fuera di Rum Diplomatico, nan ta bin cu biña di Argentina, di Spaña y tambe di Chile y tambe nan tin whisky.
Cava Wine and Spirits ta apoya tur evento social y tambe Patio 15 cu su actividad diasabra awo.
Nos no por lubida e cuminda cu lo ta sirbi durante e evento Dine, Hits & Fun di diasabra awo. Banda di un bon biña e cuminda mester ta sirbi. Mark Benson Denz, propietario di Patio 15, ta conta cu despues di a haci algun cambio riba e ‘back yard’, diasabra awo nan lo bay tin algo diferente. Lo bay tin un 3course pasta. E lo bin cu un biña cu ta special pa e tipo di smaak cu e pasta ey tin.
E prome pasta lo bay ta un dushi pasta Alfredo (pasta penne). Cu Alfredo bo no por bay robes cu galiña.
E di dos course lo bay ta Fetuccini cu shrimps. Cumind’i lama semper ta dushi. E shrimp lo ta haci den un saus di mantec’i conoflok (garlic butter), cu por cierto ta masha dushi mes.
E di tres pasta lo bay ta Angelhair Pasta. E ta un pasta hopi mas fini cu spaghetti. E pasta aki lo ta presenta cu un balchi masha dushi mes. Tur cos lo bay ta bunita presenta cu bon porcion di cuminda.
Amante di bon cuminda lo bay disfruta di e dinner aki compaña pa su respectivo biña. Tambe lo bay tin un di cuater biña, cual ta un Rose di Bread & Butter.
E lo ta un anochi cu bo no mester preocupa di nada. Bo ta paga un solo prijs, bo ta haya bo bebidanan prepara, bo ta haya bo cuminda prepara y no mester worry pa dicidi y mira menu.
E lo bira un anochi tremendo, Mark Benson Denz a afirma.
Importante di e Wine Dinner ta cu e ta traha cu orario. E evento lo cuminsa pa 8:00 pm y un rato despues e cuminda ta sali cu su biña. Despues di mas of menos 25 minuut, e siguiente course lo sali cu su biña. Ta importante pa tur hende t’ey na ora, pa no falta ningun course.
Na momento cu Hits & Fun ta presentando y si kier scucha un cancion specifico, por haci un peticion y e lo purba di complace gusto di un y tur.
Abo so falta, asina ta, bin cu bo amigonan, bin cu bo pareha, bin disfruta di un bon cena y alabes scucha bon musica.
