E crèchenan a bini hunto pa informa cu nan ta di acuerdo cu e cambio di ley cu gobierno ta implementa. Pero pa nan por cumpli cu e ley aki, e crèchenan mester aumenta nan prijs.
Marelyn Martijn, vocero di Centro di Cuido di Aruba, a manda palabra di elogio pa esunnan cu ta lucha tur dia p’e cuido di mucha ta uno di calidad. El a sigui splica cu e doñonan di diferente Centro di Cuido, esta kinderopvang, ta di acuerdo cu e cambio di ley. Tambe cu tur e cambionan necesario cu mester haci pa por mehora cuido p’e muchanan. Nan ta haciendo nan esfuerso desde momento cu e ley a drenta na vigor pa cuminsa haci e cambionan necesario cu ley ta rekeri.
Pa nan por cumpli cu diferente rekisito, e ta costa placa. Aki el a trece algun ehempel manera infrastructura material, extra personal. P’e motibo ey, e centronan di cuido a tuma e decision di aumenta nan prijs.
Motibo di esaki ta bin door cu mas mayor ta debi di ratio cu ta para den e ley. El a splica cu ratio ta un cantidad specifico di mucha segun ley ta indica pa un leidster. A implementa e ratio pa asina brinda miho calidad di cuido n’e muchanan den un grupo mas chikito di mucha.
E ratio ta hinca como lo siguiente:
· Mucha 0 – 1 aña: 6 mucha pa leidster;
· Un pa dos aña: dies mucha pa leidster;
· Dos pa tres aña: diesdos mucha pa leidster;
· Tres pa cuater aña: diestres mucha pa leidster;
· Cuater pa seis aña:diescuater mucha pa leidster;
· Seis pa diesdos aña: diesseis mucha pa leidster.
E Centronan di Cuido nunca a traha cu ratio, pasobra cada centro di cuido tin nan cantidad di mucha cu ta cubri cu e scol, esta e gastonan, pa por sigui opera. Esaki no ta solamente pa cubri e gastonan, pero tambe pa cubri na luna di juli di e muchanan den peuter cu ta bay kleuterschool. Den e luna menciona nan ta perde hopi mucha y esey ta un perdida drastico pa loke ta trata e entrada.
Tambe ta pasa cu mayor ta kita nan yiu for di centro di cuido sin aviso y esaki ta loke afecta nan entrada. Nan ta haya cu esaki ta un motibo pakico nan no ta traha cu ratio. Martijn a sigui splica cu nan ta traha c’un cantidad cu por cubri e gastonan pa e bahada di entrada na luna di juli y ora mayor kita na yiu sin preaviso.
Na final di luna nan si mester cumpli cu tur gasto di e centro, sin importa cu tin menos mucha of no.
Exigi pa traha cu ratio
Awor ta exigi nan pa traha cu e ratio, cu ta un cantidad specifico nan tin di haci algun cambio pa por cumpli esaki. Entre otro busca extra personal pa cubri e extra muchanan cu normalmente nan ta traha cu ne. Tur esaki ta costa e scolnan hopi placa por ehempel salario pa e leidster, belasting, SVb.
Centro di cuido ta un negoshi priva y tin su gastonan cu mester cumpli cu ne pa por sigui brinda nan servicio. Si ley ta exigi e centronan pa traha cu menos mucha pa cada leidster, esey ta pone cu nan tin tres opcion pa haci esaki posibel. E opcionnan ta:
1. Sea ta traha cu e cantidad cu ta exigi den ley cual ta menos mucha. E consecuencia ta cu e crèchenan no lo por cubri e gastonan mas mirando cu e entrada lo ta menos y na final mester cera crèche y no por sigui brinda cuido pa e muchanan.
2. E crèchenan ta traha cu e cantidad cu ley ta exigi cual ta menos mucha. E consecuencia ta cu e entrada lo bira menos y e prijsnan di cuido mester subi pa por cubri e gastonan mirando cu mester manda algun mucha cas pa por traha cu e cantidad exigi.
3. Ta traha cu e cantidad cu ley ta exigi y mester busca extra leidster pa cubri e muchanan cu ta surpasa e cantidad di exigencia. E consecuencia ta cu mester paga un salario extra, belasting y SVb. Y e prijsnan di cuido mester subi pa por cubri e gastonan extra.
Aumento di prijs
Desde prome di augustus 2024 e prijsnan di centro di cuido lo subi. Cada centro lo stipula su prijs basa riba su gastonan individual pa maneha su centro. E aumento di prijs lo ta introduci den fase y no completo den un biaha. Cada centro lo avisa e mayornan di adelanta e suma y durante ki luna di e aña lo subi. Algun centro a cuminsa avisa e mayornan caba y algun ya a cuminsa haci aumento di prijs.
Nan tin un flyer cu lo comparti cu e mayornan unda tin e informacion di aumento di prijs. Segun Martijn, tin di avisa cu no tur centro lo haci e cambio aki. Algun centro no lo ta perhudica door di e cambionan aki y pa awor a dicidi no haci e cambionan, pero gran mayoria di centro na Aruba si ta sali perhudica y ta sinti obliga pa haci e aumento di prijs pa por cumpli cu tur exigencianan di e ley.
Esunnan cu mas ta perhudica, ta e centronan cu ta cobra un averahe di awg. 350 pa awg. 500 pa luna pa ful dia of awg. 200 pa awg. 350 pa mita dia/traimerdia.
Pa mas lesa TREMPAN.COM.
