Nos por a compronde cu corte di casacion lo no duna su veredicto e luna di mei aki mas. E strategia di partido MEP a duna resultado desea p’esey e votacion den nos Parlamento a keda empata na 10. Si e ley a pasa partido MEP lo perde voto. Partido MEP no ta carni ni pisca. Segun nos por a compronde tabata tin cosnan cu no a bay segun regla den nos Parlamento ora di e votacion.
Tin bisa cu partido MEP y partido AVP a brasa otro den e resultado aki. Presidente di Parlamento a pone e ley di matrimonio di mesun sexo pa wordo trata diabierna 24 di mei 2024 pero despues a hal’e te pa dia 18 di juni 2024 cual contra ley tambe. E resultado no tabata un victoria paso nos Dios nunca ta empata sino semper ta gana.
Ora di tende cu educacion di nos criaturanan no lo wordo afecta si e matrimonio di mesun sexo bira legal. E plan aki ta hinca den Sustainable Development Goals punto cinco, igualdad di genero cu gobierno di partido AVP a firma na september 2015 y ratifica pa gobierno di partido MEP. Nos tur sa cu e lo no keda te aki paso punto 4 educacion di calidad di Sustainable Development Goals mester drenta e enseñansa diabolico aki na scolnan. Si e geregistreerd partnerschap tabata bon pakico a bin cu e cambio di ley di matrimonio di mesun sexo. Facil e geregistreerd partnerschap mester habri porta pa e matrimonio di mesun sexo drenta.
Laga nos no lubida cu Minister di Economia, Comunicacion y Desaroyo Sostenibel a cuminsa bishita nos scolnan. Na Hulanda nan tabata tin bukinan cla pa scolnan. Gobierno Hulandes a cambia y awor nos lo mira kico lo bay pasa. Na Inglatera a pone un stop na e enseñansa nan aki. Unda e Sustainable Development Goals of Desaroyo Sostenibel a wordo introduci, e enseñansa aki a yega scol pa confundi nos criaturanan.
Un cambio den gobierno di paisnan cu tabata goberna pa partidonan socialista pa partidonan conservador a para leynan inmoral y no a sigui cu implementacion di e agenda di Desaroyo Sostenibel. Alemania ta pro e agenda 2030, Desaroyo Sostenibel, a caba di pasa un ley cu ta dicriminalisa pornografia infantil. Pueblo, e politico cu ta bisa bo cu e enseñansa lo no yega scol ta paso e ta un gaña bo.
Gobierno nunca kier a bin cu un referendum paso gobierno no tin boluntad. Den tres luna di tempo gobierno por prepara un referendum y laga pueblo scoge si pueblo kier mantene e matrimonio original di Dios. Nos por a tende cada bes cu mester separa estado for di religion. Netamente ta esaki e gobiernonan a haci durante nos 38 añanan di Status Aparte esta di tene Dios pafo di gobierno.
Ora nos bisa cu nos ta separa estado for di religion ta paso nos ta saca Dios for di nos gobierno y nos ta hinca diabel den nos gobierno. Nos tur conoce e resultado di separa estado for di religion cual resultado ta un debe nacional di mas cu 6 biyon florin. E politiconan cu kier separa estado for di religion ta simplemente ta un politico mas y nos lo sigui den mesun circulo vicioso.
Dos caminda tin. E caminda di Dios y e caminda di diabel. Mesun cos Dios a crea hende homber y a crea hende muhe. E creacion di Dios su meta ta pa multiplica y goberna. No lubida diabel tambe por haci milager y ta disfrasa na angel di luz.
Nos por mira cu politiconan ta troce palabranan tur sorto di manera pa gana voto. Eleccion lo ta e aña aki ainda. Politiconan cu ta manipula pa gana voto no ta trece ningun prosperidad pa pueblo. E pueblo di Dios no por keda dividi. Dios no ta dividi Su pueblo. Un Cristian cu mentalidad di reino no por wordo dividi pa vota pa partido MEP of partido AVP.
E unico partido cu a para pa principionan di Dios y cu leynan di Dios no ta negociabel ta partido Curpa. Dios ta na prome luga den nos gobierno lo tin husticia y lo tin prosperidad. Esaki ta tempo di Dios y ta perfecto.
Partido Curpa ta e unico alternativa.
