Den Marco capitulo 11:23 – 26, Hesus a contesta nan: “Tene fe den Dios, di berdad Mi ta bisa boso ken cu bisa e sero aki. Sea kita for di eynan y tira den lama y no duda den su curason. Ma kere cu loke el a bisa ta bay sosode. Lo haci esey p’e.” P’esey Mi ta bisa boso, tur loke boso pidi ora boso ta haci oracion, kere cu bo ta ricibie y e lo bira di bo so. Ki ora cu boso ta para haci oracion, pordona si boso tin algo contra un hende pa boso Tata cu ta den shelo tambe pordona boso, boso transgrecion. Ma si boso no pordona, boso Tata cu ta den shelo tampoco lo pordona boso transgrecion.
Pa medio di esaki nos kier a divulga na tur famia kico lo sosode ora tur hende den cas pone nan fe den Dios.
Pasobra a yega e tempo pa stop di papia y cuminsa kere, pasobra e tempo ta dificil y ta solamente esunnan cu ta kere den Dios lo mira e gracia di Dios move den nan bida.
Hesus mes ta papia y bisa cu nos mester tene fe den Dios. Kiermen no ta Dios su falta cu no tin progreso ta nos falta di fe of nos materialismo ta pone cu nos no ta haya e cos nan cu nos ta pidi.
Si bo pidi algo na Dios mainta y atardi bo mes ta contradeci bo peticion cu duda y murmuracion. Bo ta pone bo peticion na peliger y na final lo bo no ricibi locual bo ta pidi.
E union den oracion den cada cas di famia ta esencial, no solamente ora di malesa pero den tur ocasion cu tin un necesidad y nos mester pidi intervencion di Dios.
Hende a bira materialista cu nan ta kere den tur pronostico humano, mientras cu fe den Dios ta debilita y nan no ta corda cu Dios ta Todopoderoso.
Ta haci hopi estudio lagando Dios afo pasobra hende sa mas cu Dios y locual hende bisa ta esey ta conta. Ta p’esey tin tanto desorden social.
Pero nos ta mira cu Hesus ta bisa cu ora bo tin fe bo por bisa un sero move y cay den lama, esey ta nifica cu no ta importa e tamaño di e problema of malesa of adiccion of finansa. Ora bo pone bo fe den Dios y no duda, lo bo ricibi locual cu bo ta pidi.
Ta kico ta falta hende cu e no ta kere den Dios? Pasobra cerca Dios tur cos ta gratis mientras cu hende tur dia ta envidia, desea otro malo, traiciona otro pa haya locual e persona tin. Mientras cu Dios ta duna e caminda facil cu si bo kere lo bo haya locual cu bo ta desea,
Un cos si tur hende mester sa cu tur locual cu nos pidi mester ta den boluntad di Dios, pasobra Dios no ta kita for di bo ruman y duna bo. Dios no ta kibra un matrimonio y destrui un famia, pone yiunan riba caya, separa mucha for di nan mama y asina lanta un otro famia.
Pero locual tambe e palabra ta siña nos ta cu nos mester pordona, pasobra hende kier tur cos di Dios. Pero nan no kier laga los di nan prohimo. Nan no kier pordona, nan ta sigui persisti y e palabra ta siña nos cu esun cu sconde su pica lo no prospera y falta di pordon ta pica. P’esey Señor ta bisa, pa ora nos ta haci oracion nos corda pordona.
Cuminsa awe mes, cual ta e necesidad den bo cas, kico bo mester, wak si locual bo tin mester ta den boluntad di Dios. Pidi Dios, confia Dios sin duda den bo curason y lo bo mir’e sosode. Bo no tin mester di kibra ningun hende pa bo logra bo meta.
Dios tin bo bendicion pa bo y ningun hende no por stroba bo di ricibi. Ta bo fe ta move man di Dios.
