Tur locual ta sosode riba mundo actualmente y cu tin hopi hende preocupa, hasta tin hopi cu kier tuma decision riba nan mes, ta mustra nos cu pasobra hende a hala for di Dios. Nan no ta mira cu Dios mes tin e solucion.
Dios no a cambia e ta mesun Dios, ayera awe y pa semper, E ta Todopoderoso. Pa Dios nada ta imposibel y tur cos ta posibel pa esun cu ta kere. Milagro ta sosode ora nos invita Dios su presencia den nos situacion. Nos oracion ta nos comunicacion cu Dios, si oracion por cambia nos bida, e por cambia tur locual cu tin rond di nos.
Un oracion no tin mester di hopi palabra of un monton di palabra grandi ni tampoco hopi sabiduria. Solamente e mester sali for di un curason cu ta kere, agradecido y sa cu Señor ta capaz pa recompensa su confiansa. Solamente den Señor e tin speransa.
Ma El a bisa e cosnan cu ta imposibel pa hende, ta posibel pa Dios (Lucas 18:27).
Hesus a keda wak nan y a bisa cerca hende esaki ta imposibel, ma cerca Dios tur cos ta posibel.
Ta dificil pa nos mira e gloria di Dios, pa nos experiencia milager. Si nos kier tene Dios for di tur asunto y trata di haci tur cos riba nos mes. Aplicando tur tipo di conseho, sabiduria y lubida cu Dios ta doño di tur cos.
Awendia nos tin masha reunion cu hende, pero locual ta mas importante. Nos mester reuni cu Dios constantemente. E ora ey nos lo mira claridad den tur asunto.
Hopi biaha cu nos mes boca nos stroba e milager di sosode pasobra nos ta haci oracion pero nos no ta kere y spera den Dios. Nos ta pidi Dios algo y nos ta cla pa busca otro opinion den mundo, pasobra segun nos Dios ta tarda.
Cuanto hende no kier a core dilanti di Dios. A resulta mal frustra, yen di stress y depresion, pero tur esunnan cu a tuma e asunto cu calma, cu confiansa den Señor a wordo bendiciona.
Milager ta sosode ora nos forma di pidi ta simpel, humilde y nos actitud ta agrada Dios. Pasobra hende no por demanda Dios pa nada, pero hende mester humilia nan mes den presencia di Dios y reconoce cu nan mester di ayudo. Y Dios ta capaz pa soluciona tur cos.
P’esey despues cu un homber y un muhe casa cu otro, nan ta bira un den presencia di Señor. Pa nan acerca hunto e trono di gracia di Dios, pasobra ey den e forsa ta sinta.
Palabra di Dios ta bisa: Atrobe mi ta bisa boso, cu si riba tera dos di boso bay di acuerdo tocante cualkier cos, cu nan pidi, esaki lo wordo haci pa nan door di Mi Tata cu ta den cielo.
Hopi hende casa no sa di e bentaha cu nan tin den Cristo Hesus, pasobra nan a obedece e palabra di Dios como homber y muhe y a casa cu otro. Y awor ta gosa di un privilegio cu solamente Dios por duna, nan ta uno pasobra Dios a haci nan uno.
Laga nos corda cada biaha cu nos ta haci oracion. Si nos tin algo contra un persona pa nos pordona e persona y asina nos Tata cu ta den cielo tambe lo pordona nos. Tin un milager ta warda cada persona, cada hogar y cada famia ora nan tur bini hunto cu fe y haci oracion na Dios Tata Todopoderoso.
