A bin cu e idea pa crea Fundacion Corector di Papiamento cu e meta pa tin mas persona den comunidad skirbi bon y ta miho den nos mesun idioma di Papiamento. Pero e grupo di corector ta birando mas chikito. P’esey ta crea curso pa haya mas persona pa bira un corector.
Glenda Reiziger, presidente di Fundacion Corector di Papiamento, a splica prome cu Covid-19 constantemente nan tabata cu otro fundacion, cu otro instancia. Constantemente nan tabata haci hopi proyecto pa promove Papiamento. Despues di Covid, nan tambe a para un tiki manera otro a haci. Recientemente a tuma luga un anochi di dedicacion na e docentenan Ramon, Mario y Pedro. Esey tabata nan prome actividad despues di basta aña.
El a indica cu constantemente nan mes ta keda promove y ta haci hopi revision. Nan ta keda haya cu hende ta acerca e fundacion pa revision di buki, texto.
Bira corector
Pa bira un corector, segun Reiziger, esey ta un problema cu nan tin. P’e motibo ey nan a organisa e curso aki como corector. Desde aña 2002 cu e prome grupo aki a haya nan diploma, cual tabata haci pa gobierno, nunca mas a bin cu e curso aki. “Anos ta haya falta di mas corector,” el a expresa. E grupo a bira mas chikito y mester di mas hende. Cu e prome modulo aki, ainda no e participantenan no ta haya e titulo di corector. Pero lo haya e titulo na final di e curso aki, esta despues di modulo 4.
Enfoca riba esunnan cu ta traha
A puntra Reiziger riba e echo si a acerca studiante di EPI of IPA pa forma parti di e curso aki, el a indica cu no a haci esey. El a indica cu nan a enfoca mas riba e hendenan grandi, esunnan cu ta traha.
Na momento cu el a tende di e noticia cu desde augustus e scolnan lo inicia cu Papiamento como lenga di instruccion, esey p’e fundacion ta hopi importante. Nan ta enfoca pa bringa p’esey, pasobra nan no a haya Papiamento na scol.
Esunnan cu ta forma parti di e fundacion no ta docente. Esey a pone cu nan a acerca e docentenan pa duna e curso y asina ey keda n’e nivel cu e fundacion kier yega.
Pa mas lesa TREMPAN.COM.
