Bida ta dushi, bunita, agradabel, yen di goso y pas, p’esey ta bon pa nos tuma tempo y samina nos mes, y wak bon ken ta goberna nos bida.
Pasobra e bida cu nos tin, nos a ricibi di Dios, y pa e motibo ey nos tin cu tene bon cuenta, ken kier drenta y daña locual Dios a crea.
Ningun hende no por sirbi dos Dios, un bida mita cu Cristo Hesus, y mita cu scuridad. Esey ta trece un cansancio mental, cual awendia ta wordo yama stress y depresion.
P’esey hopi no ta compronde dicon nan ta discuti, dicon nan ta pleita, dicon tin rabia, pero ora nos haci un saminacion, nos ta bay ripara cu ta pa motibo cu nos mes ta bula di aki pa aya den nos bida, sin tene cuenta cu Dios, asina situacion ta transforma y bira delicado.
Hopi biaha bo ta puntra kico a pasa, con bini e situacion a yega asina leu, y na e momentonan ey nos tin cu corda cu ta Dios ta manda, y tin decision cu a wordo tuma sin consulta cu Dios, y awor nos tin cu bini bek cerca Dios.
Pero tin algo masha peligroso, cu ningun hende no tin cu haci y esey purba chercha Dios of haci bofon di Dios.
Si bo gaña un hende, bo tin cu drecha e asunto y pidi despensa, si bo uza nomber di Dios pa gaña, ta resulta cu na final cu ta bo mes bo ta gaña, pasobra ningun hende no por gaña Dios.
Tuma bon nota di e direccion cual bo bida ta bay;
Si tur momento tin discusion.
Si tur momento tin murmuracion.
Si bo no ta agradecido.
Si bo ta manipula.
Si bo kier uza un autoridad cu Dios no a duna bo.
Si bo no ta duna Dios e luga cu e merece den bo bida,
Si bo ta wanta hende na curason.
Si bo ta pensa cu bo tin derecho di castiga hende.
Si tur momento bo ta mas sabi, y no bo por cu orden ni coreccion.
Check bo rabia, y wak cuanto bo ta cunsumi, pero tene cuenta cu esey ta aleha bo for di Dios.
Stop di hunga victima ora bo sa masha bon, cu locual bo kier haci no ta den boluntad di Dios.
E ta parce increibel, pero hopi biaha ta e manera cu hende ta trata Dios y nan prohimo ta causa di nan depresion.
E bida cu Dios a duna bo ta bunita, no lubida cu bo tin un enemigo cu kier horta bo bida (Juan 10:10).
P’esey ora bo ta den bon, e enemigo ta haci tur manera pa bo no mira bondad, pero sigui cu e trikinan di e bida pasado.
Palabra di Dios ta bisa den Mateo 5:16: Laga boso luz briya dilanti di hende, di tal manera cu nan por mira boso bon obranan y glorifica boso ta cu ta den shelo.
Ora un hende su consenshi no ta reclam’e nada, esey ta nifica cu su contacto cu Dios ta kibra.
Ora un hende ta uza triki y malicia, pa e mes no tin tempo pa Dios y asina causa cu otronan no tin tempo pa Dios, su bida spiritual a fria.
Ora un tata of mama no ta biba segun palabra di Dios y ta stroba of no ta dirigi nan yiunan den caminda di Dios, nan mester arepenti y bin bek completamente cerca Señor.
No laga nada den bo bida ta mas grandi cu Dios.
