Organo Ehecutivo AZV a tuma nota di un articulo yama “Pashent di Aruba a haya muri na Bucaramanga y ainda su curpa ta pega na Colombia”.
Secrecia medico
Manera ya ta conoci, AZV generalmente no ta sali cu informacion di pashent den prensa pa motibo cu como organisacion nos ta mara na secrecia medico. Ta solamente den casonan hopi limita y excepcional, unda e pashent mes y of su famia ta sali den medionan di comunicacion cu nan banda di medaya -y asina nan mes ta renuncia nan privacidad- AZV tambe ta duna informacion tocante e caso.
Caso hopi excepcional
Ta asina cu den e caso specifico aki, e pashent a fayece despues di a yega na Colombia pa ricibi tratamento. AZV a wordo notifica di su fayecimento pa medio di e departamento Internacional di e hospital. E departamento aki na mes momento a informa AZV cu segun procedimento di autoridadnan Colombiano, e curpa ta wordo tuma den beslag door di autoridadnan forensico pa identifica e curpa y haya sa motibo di e fayecimento.
Tardanza
Conforme e informacion cu AZV a ricibi, te cu awe ainda e autoridadnan Colombiano no por a identifica e curpa. E factor aki ta contribui na e tardanza pa trece e curpa bek Aruba y Organo Ehecutivo AZV a pone e caso aki den man di un abogado.
Palabra di condolencia
Como AZV nos ta lamenta e caso y ta extende nos condolencia pa e miembronan di famia di e defunto. Ta di spera cu pronto autoridadnan Colombiano lo resolve e caso aki.
