Riba 9 di december proximo lo tuma luga e compentencia di debate y speech organisa pa Parlamento Hubenil. Esaki ta nan di dos edicion di un competencia di debate. E topico pa e aña aki lo ta ‘Green skills and development’. Ya pa 2:30 pm porta lo habri y e evento mes lo tuma luga den e College Zaal di Colegio EPI. Allan Ridderstap ta forma parti di e team di mercadeo di Parlamento Hubenil. Ridderstap a conta cu a scoge e tema aki mirando cu ta den cuadro tambe di e Dia Internacional di Hoben cual a celebr’e riba 12 di augustus ultimo. Ta importante pa papia riba e tema aki. P’asina sa kico tur ta e posibilidadnan di trabou di energia sostenibel pa futuro y con e avansenan ta pa cu desaroyo sostenibel.
Recientemente un ekipo di Parlamento Hubenil a bishita diferente compania y organisacion na Aruba p’asina mira con leu e desaroyo mes ta riba nos isla. A bishita compania manera Elmar, Ecotech y UNESCO. Durante nan investigacion por a conclui cu Aruba no ta asina avansa riba desaroyo sostenibel manera cu a pensa.
Y ta netamente a organisa e evento aki p’asina ricibi e opinion di e hobennan. Parlamento Hubenil kier sa kico e hobennan ta pensa riba e topico aki. E competencia ta consisti di dos parti, debate y speech. Por lo menos pa e speech cada hoben lo ricibi un total di tres minuut pa vocifera su pensamento. Si dado caso e hoben no ta familiar cu papia dilanti publico, Parlamento Hubenil tin curso nan special p’asina yuda e hoben grandece su abilidadnan pa papia dilanti un publico grandi. Por contact Parlamento Hubenil riba nan plataforma social p’asina por inscribi pa e curso. E evento ta pa hobennan entre 12 pa 24 aña. Tambe ta un tremendo momento p’asina forma di e organisacion aki, esta Parlamento Hubenil.
