Por menciona cu riba 18 di september Jaxx a participa den un local careda na San Diego (California) den categoria 5 aña “Intermediate”, na unda a logra sali na prome luga.
Riba 23 di september Jaxx a sigui participa na e caredanan di “SoCal Nationals”, Los Angeles. Aki Jaxx a logra sali na prome luga den tur tres careda di e “main event”, esta riba diabierna, diasabra y diadomingo.
Riba 29 di september Jaxx a sigui biaha pa Daytona (Florida) pa participa na e caredanan di “Sunshine Nationals”. Aki el a wordo promovi pa “Expert”. Y e siguiente dia el a logra keda na di dos luga den e principal careda, mientras cu diasabra Jaxx a logra un cuatro puesto den e main event. Diadomingo a finalisa riba un segundo puesto den e main event.
Ta bon pa remarca cu na Daytona Jaxx tabata e unico coredo di 5 aña participando den categoria 6 aña “Expert” haciendo Jaxx e coredo mas jong den e categoria. El a bataya cu e miho coredonan di USA manera e rank#1, rank #4y #1 Gold Cup champion riba tur 3 dia.
Riba 27 di october ultimo Jaxx a participa den e di dos “Nationals” mas grandi di Merca, esta “Fall Nationals” na “Rock Hill BMX Supercross Track” (South Carolina). Aki e miho coredonan di mundo a bin pa acumula ultimo puntonan pa un bon clasificacion pa aña 2023.
Tambe mester bisa cu “2024 BMX Racing World Championships UCI” lo tuma riba e mesun pista aki.
Riba e prome dia di careda (diabierna ultimo) Jaxx a logra conkista un segundo puesto. E siguiente dia (diasabra) Jaxx a finalisa riba un segundo puesto den categoria 6 aña “Open” y riba mesun dia el a finalisa na di dos luga den “main event” den categoria 5 aña “Expert”.
Asina a core den dos diferente categoria riba mesun dia. Diadomingo ultimo Jaxx a logra conkista e prome puesto den “main event” den su categoria “5X”.
Na november awo Jaxx lo participa na e caredanan di Grand Nationals, Oklahoma. Esaki lo ta e ultimo careda importante pa aña 2023, cu ta wordo considera “The Greatst Race on Earth”. Actualmente Jaxx ta #2 riba ranking BMX USA/CANDA.
Nos ta desea Jaxx tur clase di exito den e caredanan venidero.
