Kòrsou ta un pais den desaroyo pero ku ta aparentá di tin un nivel di kriminalidat di paisnan desaroyá. Resientemente nos por a tuma nota di un kaso hopi lamentabel kaminda un mama di dos yu menor di edat a pèrdè su bida a konsekuensia di un violensia relashonal.
Komunidat a keda aun mas di shòk al saber ku kuerpo polisial ta’tin atenshon pa e kaso aki. Na aña 2012 un promé estudio tokante di violensia relashonal, ántes konosí komo violensia doméstiko, a ser hasi komo parti di un estudio di dòktorado di e eksperto estadistika sra. N. Ph.L.Van Wijk aki na Kòrsou. E estudio a konsentrá riba e prevalensia, faktornan di riesgo i e konsekuensianan di violensia relashonal kontra hòmber i muhé na Kòrsou. Algun resultado di hopi preokupashon ta entre otro un kantidat di asesinato relativamente haltu kompará ku otro paisnan, e violensia relashonal frekuente kontra di hende muhé di forma sikológiko i físiko i abusu seksual kontra hóben nan.
Ministerio di SOAW a tuma inisiativa pa hasi algu ku e situashon preokupante aki i na febrüari 2018 a presentá un Plan Nashonal pa kombatí violensia kontra hóben i violensia relashonal den estrecho koperashon ku otro ministerionan (GMN, OWCS i JUS) i NGO’s (Fund. Bos di Hubentut, Fund. Dedima, Fund. Nos tei pa Otro i Fund. Muhé Uniformá) i a forma un komishon ku a formulá un guia stratégiko di implementashon ku un plan di meta i akshon dirigí riba kada grupo di enfoke pa yega na resultadonan ku mester resultá den bahada supstansial di e violensia relashonal den pais Kòrsou.
Tumando na kuenta tur loke ariba menshoná Parlamentario sr Yves Schoop a hasi Minister di Desaroyo Sosial, Labor i Bienestar, sr Hensley Koeiman e siguiente preguntanan:
- Sr. Minister ta konsiente ku e situashon di violensia relashonal ta lantando kabes den nos pais i ku esaki ta hopi mas dirigí riba hende muhé, hóben nan i nos grandinan?
- Sr. Minister por indiká kiko ta e status aktual di e komishon ku a wòrdu instalá pa bai implementá akshonnan dirigí riba e problemátika di violensia relashonal?
- Sr. Minister por indiká kua ta e akshonnan konkreto ku e komishon aki a logra hasi entre febrüari 2018 i presente?
- Tin un kolaborashon inter-ministerial i ku e fundashonnan NGO manera tabata e intenshon na inisio di e proyekto Nashonal? Si ta si, kon esaki ta struktura?
- Kua ta e tareanan i responsabilidatnan di kada ministerio
Kua ta e fondonan disponibel pa invertí den e plan di akshon pa logra resultadonan konkreto?
- Sr. Minister por indiká pa ki temporada por duna un relato di e akshonnan i resultadonan di e komishon menshoná?
- Sr. Minister por indiká si tin proposishon nan di lei pendiente di parti di gobièrnu pa krea mas protekshon pa e víktimanan di violensia relashonal?
