No ta un, sino varios miembro di Parlamento, e organo mas halto den comunidad, ta participa activamente den carnaval. Gerlien Croes, un miembro independiente, tambe ta un carnavalista conoci. E no ta contento con SMAC y polis a core e parada ayera na San Nicolas.
“Ta un Carnaval 70 nos tin pa celebra, aunke nos sa con hopi ta rekeri pa organisa y garantisa siguridad, laga nos Aruba y carnavalistanan cu a haci hopi inversion, gosa awe! Duna pueblo y nos bishitantenan maske ta 5 ora di parada awe den nos gran final. E schedule publica un rato pasa ta bolbe mustra 4 ora na careda manera ayera”, esaki ta loke e parlamentario a publica un rato pasa.
Aunke el a participa activamente den carnaval desde mucha chikito, ta exactamente binti aña pasa (2004), cu Gerlien Croes a titula Miss Teen Aruba y tambe Reina Hubenil di Aruba. Y diesdos aña pasa, na 2012, el a bay cu e titulo di Reina Grandi di Carnaval di Aruba, participando pa Royal Carnival Group. Esey tabata e prome aña cu Royal Carnival Group ta participa den carnaval y ya a bay cu e titulo di Reina Grandi.
E opinion di Gerlien Croes ta comparti pa hopi carnavalista, cu no ta di acuerdo con e organisado y polis a maneha e tempo. Ta hasta opina cu si core e parada y caba 6:00 pm awe, cu lo kima e momo sin carnavalista!
