Ta berdaderamente hopi tristo, di basta tempo caba Hulp Bestuurskantoor San Nicolas ta den un estado deplorabel. Servicio cu ta duna na comunidad di San Nicolas ta hopi limita. Awo a yega asina leu cu e mester a cera. “Mi ta compronde cu el a wordo cera pasobra ta toca un problema di siguridad tanto pa e trahadonan y siguridad p’e cliente. Ta hopi tristo y ta lamenta cu esaki mester a sosode. Di tur e MFA cu a traha na Aruba, e edificio di San Nicolas ta un di nan cu mester a traha prome. Tabatin un presupuesto disponibel pa tur 5 MFA y na final di dia net esun di San Nicolas no a wordo traha, door di un mal maneho”, asina Alvin Molina a critica awe.
“Na luna di april ultimo, durante tratamento di e presupuesto 2022, mi a entrega un mocion unda mi a urgi gobierno pa duna atencion na Hulp Bestuurskantoor di San Nicolas, pa un dia e bira un MFA completo pa asina e pueblo di San Nicolas tambe ta mas cerca di cas pa cu Censo y Belasting. Consecuencia di a cera di Hulp Bestuurskantoor ta cu un papel di 5 florin awo ta bay costa bo 10 florin, pasobra bo mester paga bus pa bay bin bek. Otro siman Parlamento di Aruba ta trata presupuesto 2023 y sigur mi lo trece mi mocion dilanti atrobe y puntra Gobierno kico ta e causa cu e Hulp Bestuurskantoor ta den estado deplorabel. No solamente e servicio tabata minimal pero cu a yega na e punto cu mester wordo cera. Mas importante pa sa kico ta bay ta e solucion y riba ki termino”, asina e parlamentario cu ta sostene e gobierno actual a termina bisando.
