Diasabra atardi Yoyo’s Kick a batisa nan uniform nobo den Centro di Bario Noord. Como padrino di e bautiso a fungi parlamentario Endy Croes (MEP) y madrina tabata su casa, Dilailah Croes. E bautismo a sosode bou di grito di alegria y aplauso di tur e hungadonan, nan famia y algun invitado presenta pa celebra e ocasion special aki.
Yoyo’s Kick ta un ekipo nobo, cu apenas a hunga nan prome wega. Nan tin un total di 16 hungado, tur hende muhe, cu ta determina pa progresa, crece den e deporte y asina bay cu e titulo di campeon.
Kick Ball, originalmente conoci como Kicking Baseball, ta inventa for di aña 1910. E wega, ta hung’e similar na baseball, pues den liga. E reglanan di wega ta mesun cos cu baseball, solamente cu no ta picha cu man, sino ta scop e bala cu pia. Pues no ta uza un bate tampoco. Mescos cu baseball, ta purba saca e hungado “out”. Ta cambia inning, dunando cada ekipo un chens pa score. Esun cu mas punto na final, a gana e wega. Na Canada y Merca e ta un wega masha conoci y popular riba speelplaatsnan, pasobra e no ta rekeri mucho ekipo pa hung’e. Ta practica e wega aki prome como entrada pa despues hunga baseball of softball.
Presidente di e team Yoyo’s Kick ta Yury Bracho y demas funccionnan den e organisacion ta parti pa Jeniree Irausquin, Roselin Pena, Haniel Adrianza, mientras cu e manager ta Luis Reyes. Di acuerdo cu Yury Bracho, nan ta un team femenino y nan deseo ta pa engrandece kicking balls na Aruba. Como hende muhe e ta super bon pa nan tambe tin algo pa haci.
