Pa General Sales Agency Group ta mas cu un placer pa por introduci na pueblo di Aruba, Corsou y Boneiro nan servicionan nobo pa duna empuhe na comerciantenan riba e islanan ABC. Manera e nomber mes ta bisa, General Sales Agency ta haci benta y representacion di producto, servicio y agencianan riba e islanan ruman.
Pa hopi tempo caba nan sa cu e tabata dificil pa manda carga entre e islanan ABC na prijs economico y mas ainda pa sondea e interes pa cierto producto specifico den e mercadonan di e islanan ruman. Mirando e falta aki y cu experiencia di mas di 35 aña den e mundo di logistica, General Sales & Agency Group a crea e posibilidad netamente pa pusha nos localnan y nan productonan riba e mercado internacional, cuminsando entre e islanan Aruba, Corsou y Boneiro. E idea tras di esaki ta pa duna e comerciantenan chikito pero tambe e grandinan, e opcion pa amplia nan mercado y nan benta.
General Sales & Agency Group a cera acuerdonan cu partnernan strategico na Aruba, Boneiro y Corsou pa facilita tur comerciante cu ta interesa den exporta nan producto, e posibilidad di haci benta di e producto, haci mercadeo di e producto y tambe haci e end to end logistic service pa cliente, pues di ricibi e carga na Aruba, prepara esaki pa export riba un base diario, ricibi e carga den exterior, prepar’e y entreg’e te den porta di cas of negoshi. Awor esaki ta posibel na tur tres isla!
“Nos ta kere firmemente cu e islanan ruman tin hopi potencial y hopi biaha loke nos tin na Aruba, kisas Corsou no tin, pero lo kier y kizas algo cu Boneiro tin y Aruba lo kier of vice versa y esey ta na unda nos ta kere cu huntu nos por yuda tur comerciante crece, specialmente den e temporada aki”, asina Ichelle Oduber-Simon di General Sales Agency Group a bisa.
Tin hopi comerciante chikito cu sigur por haci bon uzo di e oportunidad aki pa expande nan benta y haci nan producto y of marca conoci eyfo. Nos ta hopi contento cu ya caba nos a cuminsa duna e servicio aki na algun comerciante local, di cual lo mira mas di esaki den e dianan nos dilanti y tambe mas di e servicionan cu ta ofrece.
Pa haci e serivicionan aki posibel, General Sales Agency Group tin oficina na Aruba, Corsou, Boneiro y Miami. Por tuma contacto cu nan na cualkier momento via [email protected] of bishita e pagina di facebook General Sales & Agency Group pa haya mas informacion. Sigur nan lo ta contento di por yuda tur comerciante local expande y crece den mercado internacional.
