Sindicato TOPA tabata tey na Parke Arikok, despues cu nan a haya sa cu e directiva completo a tuma su retiro.
Segun presidente di e sindicato, Rene Bernabela, nan ta contento di un banda, pero di un otro banda no, mirando cu den un forma ad hoc e directiva a tuma su retiro, sin cana e caminda segun cu ta prescribi con e tin cu tuma luga. TOPA ta haya esaki sumamente lamentabel pasobra e directiva sa cu esaki no ta e sistema caminda cu ta tuma retiro den un forma di bloke, unda cu nan a baha bay y laga e Parke den un forma no atendi.
Por mira cu awe nada financiero no por wordo haci. Ningun check no por wordo firma pasobra e directiva a distancia nan mes y no ta tumando ningun responsabilidad pa sigui continua den e parke. Aki ta caminda cu e minister encarga cu parke a bula aden di baha. Na e momento aki el a haci un bishita caba na gobernador pa intermedia.
Fuera di esey lo bay yama un rueda di prensa pa duna pueblo di Aruba informacion di loke ta e retiro en bloke di e directiva di e parke. Awor aki tambe tin cu bay hues. Esun cu tin cu duna directiva e ontbinding ta hues. Segun ley, ta hues tin cu haci esaki. Na momento cu hues duna e directiva actual ontbinding, ta duna e minister e chens pa nombra hende temporalmente pa nan por sigui maneha e parke te or cu nan nombra un directiva oficial pa nan sigui maneha Parke Nacional Arikok.
Pa loke ta e proceso di e salario di e trahadonan, esakinan tur ta keda cana normal. Esey ta nifica cu esaki a wordo regla prome cu e directiva a baha. Riba e aspecto di salario lo bay tin problema, no mas cu TOPA ta lamenta riba e manera con e directiva a tuma su retiro y laga e luga sin un capitan tras di e timon di barco, pa sigui dirigi e parke su operacion diario manera mester ta.
