Durante e celebracion di 11 aniversario di Mary Joan Foundation, PANTENE a sorprende e fundacion cu un donacion hopi special.
Ta trata aki di dos mashin di cose, esaki ta unico cos cu tabata falta pa e fundacion por haci e proyecto di “Un sonrisa un peluca” un realidad. E proyecto aki ta uno hopi bunita unda pa prome biaha na Aruba por traha peluca di cabey natural pa pashentnan di cancer.
E donacion aki ta solamente e prome parti di e campaña di PANTENE cu yama Beautiful Lengths, unda Mary Joan Foundation lo ricibi Afl. 1,- pa cada producto di PANTENE cu wordo bendi desde September 29 te cu November 19, 2018. Adicionalmente PANTENE lo yuda recauda donacion di cabey cu diferente actividad y un tour promocional cu lo bishita cada districto di nos isla.
Ja caba tur hende cu entrega nan donacion di cabey na Mary Joan Foundation lo ricibi un regalo di PANTENE. Requisito pa donacion di cabey ta masha facil: E cabey mester ta laba, mester ta por lo menos 15cm largo y mester wordo entrega den un vlecht.
“Pa PANTENE e ta un honor di por celebra e 11 aña di existencia di Mary Joan Foundation, un fundacion cu trayecto hopi bunita. Nan a y ta haci hopi trabou pa comunidad, specialmente pashentnan di cancer. No solamente nan ta duna e apoyo moral, pero tambe ta guia e pashentnan den un momento hopi dificil den nan bida”- Ana Maria Ramirez di Compra a comenta.
Papiando cu pashentnan di cancer, por mira e impacto negativo cu e perdida di nan cabey tin riba nan estado emocional y e projecto aki lo por yuda den e proceso aki, dunando pashentnan cu a perde nan cabei toch e oportunidad di luci un peluca di cabei natural y saludabel. Esaki ta duna e pashent un impulso positivo y un boost na nan autoestima cu por influensia positivamente e desaroyo di e pashent.
Pa e proyecto aki dos representante di Mary Joan Foundation a bay exterior pa un curso di traha peluca. E proceso pa crea un peluca ta dura entre 1 siman pa 1 siman y mey y ta tuma hopi ora di trabou pa e keda bon, asina Sra. Arabella Reyes Colina, presidente di Mary Joan Foundation a comenta. E idea ta pa otro aña cuminsa train personanan boluntario cu kier traha peluca hunto Mary Joan Foundation pero esaki no lo ta nada comercial. E pelucanan ta strictamente pa pashentnan di cancer, kendenan lo ricibi esaki gratuitamente.
Mary Joan Foundation ta gradici PANTENE y Compra Ltd, su ditribuidor na Aruba, p’e iniciativa di Beautiful Lengths y ta haci peticion na tur esunnan cu tin cabey largo` y saludabel pa haci donacion di nan cabey na Mary Joan Foundation. Pa mas informacion riba donacion di cabey of aportacion na e campaña bishita e pagina di Compra.
