Mesora cu a notifica Prome Minister mr. Evelyn Wever-Croes di e problema cu a surgi na aeropuerto diahuebs ultimo, desde New York el a instrui pa haci un investigacion relaciona cu e contaminacion di jetfuel na Aeropuerto Reina Beatrix. Prome Minister a duna di conoce cu e no ta comprende con algo asina por bay ‘robes’ si tin control severo riba e jetfuel na momento cu esaki yega Aruba te ora e wordo entrega na e avionnan.
“Nos pais a traha hopi duro pa hopi aña pa nos traha un bon nomber den e area turistico. E exito cu Aruba tin cu turismo ta trece cu n’e responsabilidad adicional. Y un di nan ta e responsabilidad cu FMSA tin den entrega di jetfuel.
Mi no ta compronde con algo asina por bay ‘robes’. Momento cu e jetfuel yega Aruba y wordo descarga di barco, e mester wordo getest. Momento cu e wordo almacena den e tankinan na San Nicolas, e mester wordo getest. Despues ta saca e jetfuel di e tankinan y den truck ta hiba e jetfuel airport caminda e ta wordo almacena den e tankinan. Desde e tankinan ey e ta wordo entrega na avionnan.
Mi no por imagina mi cu tur e proceso aki ta pasa sin cu ta test e calidad di e jetfuel. Unda e contaminacion a tuma luga y ken ta responsabel pa esaki, mester wordo investiga. Nos no por tolera cu ningun persona ni instancia ta haci wega cu nos unico pilar economico.
Pesey mi a instrui pa un investigacion wordo haci inmediatamente y esnan responsabel mester carga nan responsabilidad. Y si ta trata di sabotahe, e castigonan mester ta hopi mas severo”, Prome Minister Evelyn Wever-Croes a duna di conoce.
Parlamento a pasa un mocion na april ultimo pa e compania FMSA cu ta encarga cu jetfuel, cay directamente den man di Gobierno. Na e momentonan aki e compania ta cay bou di RdA y Gobierno anterior a yena RdA cu hopi hende y cu gastonan masha halto, asina Prome Minister Evelyn Wever-Croes a bisa awe.
