Ciudadano Erico Petro a tuma contacto cu 24ora pa haci un denuncia relaciona cu un situacion hopi fastioso cu e ta pasando aden na momentonan aki. E denuncia aki ta bay contra Marco Antonio Donato,35, cu a probecha durante fayecimento di su mama na Colombia pa medio di un cancer agresivo cu e tabata sufri di dje.
Marco Antonio Donato ta acusa di a habri e cuenta di banco di su mama sin autorisacion, contando nos cu ora su mama ainda tabata riba e cama den hospital sin cu tabata responde – a uza Face Scan ID, pone telefon dilanti di su mama su cara pa asina habri e cuenta y manda placa for di cuenta di su mama pa su propio cuenta.
Ta papia aki di un suma grandi di mas cu 200 mil florin. “E mester duna cuenta di loke no ta pertenece na dje.” E mama tabata tin e placa wanta pa nan bay Hulanda despues cu a bende nan hogar, pa nan bay biba na Hulanda y asina hasta tambe yuda Petro cu cuido medico cu e mester a haya. Lastimamente e mama a fayece.
Marco Antonio no ta contesta telefon ni mensahe, y ta parce cu awe e tin pensa di bandona Aruba tambe. Petro ta bisa cu Marco Antonio lo tabata papia cu e mama lo tin masha hopi debe mes pa paga pero Petro ta afirma cu esaki no ta e caso tampoco. E yiu homber aki lo a haya caba 25 mil florin for di su mama prome cu el a fayece, y el a roga su mama pa e haya mas, cual na final di dia a resulta cu a haya mas cu 40 mil florin y esaki tabata su parti, nada mas cu esey. Sin embargo Marco Antonio lo a keda cu un sed pa mas placa anto a bay riba un mision pa bay cu tur cos of mas cu e tabata por.
Petro ta bringando pa haya loke ta pertenece na dje, e no kier of ta demanda nada mas cu loke legalmente ta di dje pa motibo cu e tabata tin mas cu 20 aña casa cu e mama. Aparentemente Marco Antonio lo a pone tur e placa di e mama riba su cuenta. “Ami ta reclamando loke pa ley ta pertenece mi.”
Petro a bay haci denuncia na autoridadnan cu a bis’e cu nan no por haci nada pa motibo cu ta trata di un caso civil. “Si nos por haci algo pa Husticia haci su trabao pasobra mi ta haya algo cu ta fuera di control. Cos no por bay asina. E mester duna cara, e no ta coy telefon ni bisa nada, el a sconde. El a horta y keda trankilo, cos no por bay asina, si bo a horta bo tin cu duna cara.”
