Den un declaracion pa prensa e parlamentario di fraccion di MEP Alvin Molina ta pidi proyectonan macro y mediano pa San Nicolas cu por trece un miho balans den e desaroyo di e area aki.
Pa trece desaroyo pariba di brug y movecion di hende ta necesario pa inverti den diferente aspecto. E proyectonan grandi (macro) manera un hotel, un industria riba tereno di refineria y agricultura como un pilar economico nobo lo genera mas entrada pa caha di pueblo y crea un “spin off” pa varios negoshi.
E proyectonan mediano por ehempel, un cancha deportivo, embeyecemento, cultura, siguridad den trafico y mantencion ta haci e infrastructura mas atractivo y accesibel. Mas miho e proyectonan macro y mediano ta organisa, mas oportunidad tin pa actividadnan (economico) micro ta exitoso, entre otro, e negoshinan chikito y actividadnan social, cultural y deportivo den bario.
Pa logra un bon balans entre e posibel desaroyonan ta necesario pa profesionalnan guia e proceso basa riba e deseo di pueblo. P’esey na april 2022, el a entrega un mocion pa gobierno contrata un “economic developer/city planner/nation builder/community designer” pa yuda cu e desaroyo pariba di brug for di Pos Chiquito te cu Seroe Colorado.
Un bon ehempel di un proyecto cu lo yuda haci centro di San Nicolas mas atractivo t’e proyecto di Minister di Economia Geoffrey Wever. Hunto cu su coleganan e minister lo ehecuta un plan pa embeyece e area di Arubus na San Nicolas y crea diferente actividad cu ful famia por gosa di dje, manera deporte, speeltuin y“farmers market”. “Mi ta spera tambe cu e plan aki lo yuda p’eexito di Promenade contagia e parti mas pariba di mainstreet.”
