Diabierna ultimo Minister di Turismo y Salud Publico, Dangui Oduber tabata na Instituto Medico San Nicolas (ImSan) pa presencia e bunita momento caminda cu dr. Joel Rajnherc a anuncia e bon noticia na henter e team di ImSan cu nan a logra haya nan Preliminary Gold Seal of Approval accreditation for di “Joint Commission International” (JCI). Tabata un momento di hopi emocion y alegria pa tur e trahadonan eyden cu a traha duro cu alma y curpa pa e logro historico aki den cuido medico riba nos isla.
Durante tur e añanan cu a transcuri ImSan a traha hopi duro pa logra e acreditacion di JCI. Un reto cu a cuminsa bou di Gabinete Wever-Croes I caminda hopi inversionnan a tuma luga, asina Minister Oduber a trece dilanti. Minister Oduber desde principio a sostene ImSan y a percura pa aproba e financiamento di nan masterplan.
E acreditacion di JCI aki lo habri posibilidadnan nobo pa ImSan por sigui crece y mehora e calidad di cuido na Aruba y explora turismo medico. ImSan lo ta e prome hospital acredita den ful e region di Caribe Hulandes. Na mundo tin un total di 1000 instituto den 70 pais cu tin e acreditacion aki. Dentro di 10 dia, despues di dia 23 juni, Aruba tambe lo forma parti di dicho lista.
“Aruba sigur ta orguyoso di e logro aki”, Minister Dangui Oduber ta manda felicitacion na gerenciay henter e personal pa e excelente trabou di cuido y servicio cu a haci e acreditacion aki posibel.
Minister Dangui Oduber lo sigui duna tur cooperacion na ImSan y tambe na dr. Horacio E. Oduber Hospital pa garantisa pa mas mehoracion di cuido, calidad y servicio.
