Dr. Horacio E. Oduber Hospital ta orguyoso di mira e ekipo completo di ImSan pasa e rond preliminario pa asina den futuro por yega na e logro di “Gold Seal of Approval Accreditation” di Joint Commission International (JCI). Cada logro den cuido medico di nos isla ta na bienestar di henter comunidad y Hospital di Aruba ta aplaudi cada paso cu nan partner ta haci pa eleva calidad di cuido pa pashentnan.
Hunta di Directiva, team di maneho y staff di Hospital di Aruba ta extende palabra di elogio na henter e ekipo di profesionalnan di ImSan y ta desea nan exito den e proximo pasonan pa logra “Gold Seal of Approval accreditation” di Joint Commission International (JCI).
E beneficionan di acreditacion y certificacion di JCI
Ta drecha e administracion di risico y como resultado ta reduci e riesgonan. Un di e beneficionan di e acreditacion ta fortalece e confiansa di comunidad pa e calidad y siguridad di e atencion brinda. Evaluacion realisa pa dokternan capacita y cu experticio den siguridad di e pashent. Ademas e standardnan ta desaroya pa e expertonan den atencion medico rond mundo.
Tocante Instituto Medico San Nicolas (ImSan)
A funda Instituto Medico San Nicolas (ImSan) dia 24 di februari 2005 como un centro medico pa tratamento ambulante, situa den e districto di San Nicolas. Tin un filial cu servicio limita situa na Wayaca. Actualmente ImSan ta brinda servicio como un hospital di 22 camber pa estadia corto; servicio di emergencia habri 24 ora pa dia pa brinda asistencia medico urgente. Tambe tin un camber di parto pa dunamento di luz; servicio di dokter di cas; servicio di dokter na warda presente pa por trata problema chikito di salud, cu no por warda riba consulta di dokter di cas propio; centro di diabetes cu terapista pa pia, dietista, asistente pa caso di herida y specialista medico; dos dokter di cas, un dokter di wowo, un cardiologo, un ciruhano y dos partera; un laboratorio y luga unda ta saca sanger tanto planea of urgente (prikpost); departamento di radiografia y servicio di ambulance.
Igmar Reyes ta na cabes di ImSan como presidente, mientras cu drs. Joel Rajnherc ta den funcion di director, desde 1 di maart 2012 y ta raporta directamente na e Hunta di Supervision. ImSan a cera aña 2021 cu 273 empleado, cu ta 35 mas di locual nan a habri aña cu ne. Durante aña 2021 nan a conta cu un presupuesto di mas di 50 miyon florin na entrada, cu ta un aumento di seis miyon, compara cu aña 2020. Ta bon pa menciona cu na 2019, cu tabata aña normal sin pandemia, ImSan a maneha un entrada di apenas 30 miyon florin, pues memey pandemia nan a crece cu 20 miyon florin mas na entrada!
Tocante Dr. Horacio E. Oduber Hospitaal
Dr. Horacio E. Oduber ta existi desde aña 1976 y su nomber ta na honor di e prome dokter Arubiano. Tin mas o menos 1100 empleado trahando diariamente pa atende mas di 33.000 pashent pa aña, cu ta pasa den mannan di e mas of menos 100 specialistanan medico, cu hunto ta eherce 9.500 operacion anualmente.
Tur aña hospital ta interna 11.000 pashent, cu ta drumi un averahe di 5.5 dia eyden. Ta interna 500 turista, 2800 patient via Spoedeisende Hulp y 700 pashent cu ta bin Aruba for di nos region pa ricibi tratamento medico avansa y specialisa. Hospital ta conta cu 217 cama y ta brinda un variedad grandi di servicio medico na nos comunidad y na turistanan.
Pa por eherce tur e intervencionnan medico aki, Hospital ta conta cu un centro di rehabilitacion, un centro di terapia fisico, un departamento di emergencia, wondenpoli, diabetes center, pain clinic, oncologia day-care unit, 5 sala di operacion, Intensive Care Unit y asina por sigui menciona.
