Un rato pasa Nadiuska Santana Marquez, naci na Venezuela, di 33 aña di edad, conoci aki na Aruba bou e apodo di “La Poderosa”, a yega ward’i polis di Playa pa entrega keho contra famia Dubero, cu a maltrat’e ayera nochi den Sandra’s Garden, riba Linear Park.
Di acuerdo cu e victima, el a bisa cu e conocido taxista Eugene Dubero, di Taxi-140, a maltrat’e. E taxista tabata hunto cu su casa, su yiu muhe y un amigo. La Poderosa a bisa cu e dos hombernan a golpie, a dal’e cu un stoel di palo den su lomba. El a bisa di a pasa henter dia na Hospital pa saca potret y haci testnan y cu e ta mal herida.
Pa awo e ta haci un keho oficial na recherche pa e maltrato ricibi. Dado momento el a cuminsa yora durante e entrevista, bisando cu e ta sinti su mes cansa di tanto maltrato cu e ta hayando aki na Aruba.
Pa loke ta e susedido mes, e victima a conta cu e taxista ta casa cu un sobrina di dje. Ta un di su dos sobrinanan cu ta bibando ilegal na Aruba. Nan tur a agridie, total di 5 persona contra e so.
E problema a cuminsa ora cu Nadiuska a bay cobra Eugene un debe bieu cu e tin cu ne. Ta trata aki di $1250 cu ainda e no tin fin di pag’e. Riba dje, el a reclama e sobrina cu con por ta cu e ta bebiendo den bar cu un baby di 1 aña y mey, cu esey ta iresponsabel. E taxista, cu awendia ta casa di e sobrina, a rabia masha cu e tanta y a start un intercambio fuerte di palabra. Den e proceso Eugene Dubero a agridie hunto cu un otro homber cu tabata cu ne. E otro homber a choc’e na su garganta, mientras e tabata defende su mes. Asina e otro hende muhenan tambe a agridie, su mesun sobrinanan.
E storia di Nadiuska na Aruba ta data for di exactamente un aña pasa, ora cu a publica un video di dje y un amiga papiando cu dos polis na un patruya, pa colmo e vehiculo policial ta # 37. Ambos polis a indica cu e video ta data di masha tempo y cu nan no a haci nada malo. Asina mes a suspende nan den pleno dianan di Pasco y un di nan a keda varios luna na cas, te cu e mester a bay Corte pa busca su derecho. Na maart e dos damanan a haya nan mes envolvi den accidente y a cuminsa busca nan pasobra ambos ta ilegal y cu a pidi asilo pero cu a nenga nan.
Ora cu porfin La Poderosa mes a dicidi di bay Venezuela bek cu un vuelo via Colombia, ata Trudy Hassell ta comete un di su tantisimo blundernan y ta laga detene ora e tabata check-in na Avianca. E Venezolana a bay Hues pa pidi su liberacion pasobra e tabata cla pa bula, ta Guarda nos Costa a detene y pa e tempo ey pa colmo a cera frontera cu Venezuela. Hues a dun’e rason, mustrando cu pais Aruba mes a faya aki y cu e por keda liber te ora cu vuelonan habri pa e por bandona nos isla.
El a haya e nomber aki den pueblo pasobra riba Facebook e mes tabata yama su mes asina, pasobra den cierto forma, a logra burla di nos sistema di migracion. Aunke cu, manera Corte mes tambe a dicta, Trudy Hassell y Guarda nos Costa a bay purba hunga “power play” cu awe a costa pais Aruba, cu ainda e mesun persona….un aña despues ta na Aruba keto bay y ata awo p colmo den problema. Moral di e storia ta cu entretanto Trudy Hassell mes no ta na Guarda nos Costa mas, pero a bay laga e tipo di problemanan aki y hopi mas, atras pa Richard Kramers atende cu ne awo.
