Diasabra merdia 24ora.com a transmiti un situacion na e pacus di paña Mango den Caya Betico Croes. Cuater trahado a expresa nan malcontento relaciona cu e trato di gerencia. For di pago dudoso di salario, orarionan varia y cu ta cambia regularmente, te cu insulto di parti un supervisor stranhero. Manera ya ta conoci, for di maart ultimo hopi negoshi a perde gran parti di nan entrada y ta depende di subsidio di salario pa cumpli cu salario di trahadonan.
Ora trahadonan a acerca gerencia pa yega na mesa pa mira con por yega na un solucion, a cera porta den nan cara y papia palabra menos bunita cu nan, segun e trahadonan a conta awe durante un entrevista bibo dilanti e tienda.
Tabata suficiente motibo pa acerca e medio di comunicacion cu semper ta para cu e homber chikito, p’asina trece e situacion aki na conocimento di pueblo. Despues di asina hopi reaccion, nos mesa di redaccion a bin compronde cu a suspende e cuater trahadonan cu a vocifera nan malcontento durante e entrevista.
Segun e cuater trahadonan, tin mas empleado cu e mesun preocupacion pero debi cu compania ta firma pa nan estadia na Aruba, ta teme pa represaya.
E compania Mango ta estableci na Aruba desde juli 2001 y ta situa den caya Betico Croes # 9. E ta bou maneho di John Chemaly jr. como director di e compania. E mes no ta den e tienda diariamente y tin un supervisor Venezolana cu ta maneha e trahadonan pe. Nan ta reclama cu e ta trata nan malo, ta obliga nan traha mas pero ta paga menos. Ta sinti cu como nan no ta local, cu ta abusa di nan.
