Kiwanis Club of San Nicolas ta organisa Foot Golf Event. E fondo cu nan recauda di e evento aki, nan ta uza pa organisa proyecto pa duna bek na comunidad.
Esther Emerencia Gomes, presidente Kiwanis Club of San Nicolas, a splica cu nan club ta uno nobo, pero den e poco añanan di existencia nan a presenta hopi proyecto cu impacto grandi den comunidad. E proyectonan aki tabata un exito danki n’e apoyo di comunidad y sigur p’e muchanan. Tur loke e club ta organisa fin di dia, ta na bienestar di e muchanan cu ta 100% futuro di Aruba.
Den e club di Kiwanis of San Nicolas tin un comision cu ta encarga pa fundraising p’asina ey nan por tin fondo p’e proyectonan importante cu nan kier presenta na comunidad.
Joanette Vrutaal, coordinador di Comision Proyecto di Recaudacion di Fondo, a splica cu e evento lo tuma luga na Aruba Golf Course cu ta situa na San Nicolas. El a conta un tiki dje historia di golf course cual e prome tabata den area di Cura Cabay y esun di San Nicolas cu ta di nuebe buraco ta esun di dos. Nan ta organisa nan prome Sunrise City Foot Golf Event y tur fondo recauda ta bay bek den nan proyectonan pa comunidad.
Deborah van den Berg Alexander, coordinador di Comision Proyecto di Recaudacion di Fondo, a indica pa motibo cu Mundial di Qatar a cuminsa diadomingo ultimo, nan a pensa pa simbolisa na esaki a opta pa organisa e evento di Foot Golf. E Foot Golf ta un evento hybrid cu ta existi pa hopi aña. E no ta hopi conoci den comunidad y nan kier rebiba e evento aki. E evento lo tuma luga dia 10 di december proximo, ta cuminsa pa 8:00 am. Tin un inscripcion di 500 florin pa team y ta inclui desayuno na San Nicolas. E evento aki ta pa tur hende. homber ta hunga golf pero tin hende muhe tambe ta haci e deporte aki, p’esey Kiwanis Club of San Nicolas ta invita tur hende mayor di edad pa forma parti dje evento aki. Ta bay tin premio pa e ganado. Ya por cuminsa inscribi pa participa den Foot Golf Event y riba nan pagina di Facebook por haya e link pa haci esey.
Jermaro Emerencia, director di PR & Branding, a invita Aruba completo pa duna aporte n’e Food Golf Event. Pa mas informacion por tuma contact cu nan via Facebook. Tambe el a enfatisa cu e fondo recauda ta bay bek semper p’e muchanan.
