Na december proximo e directiva lo a cumpli dos aña na mando, pero un diferencia di opinion interno a causa cu un miembro a tuma retiro. Esey tin como consecuencia cu henter e directiva a bira demisionario y no ta keda nada otro cu yama eleccion nobo, cu lo tuma luga dia 16 di februari 2024.
Statuto ta bisa cu e directiva di Sindicato di Polis Aruba (SPA) por consisti di 7 of 9 miembro pero nunca menos di cinco. Na momento cu a instala e directiva actual nan tabata shete, pero den algo mas di un aña, dos miembro a dicidi di tuma nan retiro for di directiva. Consecuentemente a keda cu un directiva limita na miembro, cu a haci e trahamento dificil y fragiel. Un hende mas cay afo, ta nifica cu e directiva ta cay! Y esey a sosode diabierna atardi tambe, despues di un reunion exitoso di e altocomisario hunto cu e miembronan na Club POVA.
No tabatin problema den reunion
No tabatin ningun problema durante e reunion. “Al contrario, e reunion a bay hopi bon”, asina Rodney Solognier, e presidente demisionario di SPA, a sigura na nos. El a admiti cu ta un asunto di algun dia caba andando cu a desemboca den retiro di e vice-presidente Rolando Maduro.
Reto constant cu directiva
Mester menciona cu ultimo tempo e sindicato ta rondona di reto. E ultimo presidente prome cu Solgnier, esta Jose “Chubato” Dirksz, tambe a tuma retiro memey di su periodo. E directiva ta sinti cu hopi biaha no ta conta cu sosten di miembronan ora di yama reunion pa tuma decision. Pero critica si e directiva ta haya su mes confronta cu ne constantemente, haciendo e funcion uno mal gradici pa e polisnan mes.
Integridad? Cobra overtime ora no traha pa SPA
E ultimo reto tin di haber cu integridad den seno di directiva di e sindicato. Parce cu tin un areglo cu diahuebs y diabierna ta considera “SPA-dag” pa cual e directiva ta haya “liber” di nan trabou policial pa por atende asuntonan sindical. Nan ta sinta na nan oficina pa atende cu retonan di nan miembronan. Pero, ta aki mes e problema ta sinta. Algun miembro di e directiva ta haci mal uzo di e areglo aki y ta opta pa traha toch riba diahuebs y diabierna y marc’e como “overtime” pasobra ta nan dia di traha den sindicato. Pero como polis y siendo cu ta pagando caba pa e dianan ey, tin hende ta cuestiona si e cobransa “extra” aki ta legal y tambe si e ta integro!
Ta teme cu lo cobra tur e placa bek
Rolando Maduro, vice-presidente di SPA ta un di e miembronan di directiva cu a cuestiona e practica dudoso aki. A splica e polisnan envolvi cu tardi of trempan e asunto aki lo bira un problema y cu CAD lo investiga y probablemente DRH lo instrui Departamento di Finansa di Gobierno di Aruba pa cobra tur e placa cu a skirbi inhustamente na overtime. Claro cu esunnan envolvi no a keda contento y e relacion interno den e tiki miembronan cu a resta a bay atras.
A kere cu District Dag lo a bira “overtime dag”
Recientemente tabatin un dia special, den cual cada districto a tene un dia di recreo pa e polisnan cu ta traha tur dia cu otro, por conoce otro miho. Tabata riba un dia asina cu diripiente a presenta un scarsedad y e superiornan di Rolando Maduro a pidie traha toch, aunke tabata riba un dia cu normalmente e lo mester a traha pa SPA. El a haci esey pa trabou por sigui normal. Su coleganan den SPA a imagina cu e lo a cobr’e na overtime, saliendo for di e punto di bista cu tur ta hacie asina semper. Mesora esunnan envolvi den cobramento di overtime a bay reclama Maduro dicon e si ta hacie. A hasta catalog’e como un “mort’i hamber” pa chica placa di overtime di gobierno. Y como cu e presidente no a intermedia y corigi e miembronan di directiva cu a insult’e, el a dicidi di entrega su retiro for di e directiva di SPA. El a sigura di NO a cobra overtime na ningun momento!
Directiva “a cay”
Como cu a resta cuater miembro so, a pone cu e directiva a bira ilegal y mester a yama eleccion mesora na februari 2024. Rodney Solognier lo pone su mes reeligibel? “Mi no sa ainda. Mi tin cu pens’e”, asina el a contesta. Mester menciona cu nos a haci e mesun pregunta na Rolando Maduro, cu ta conta cu un bon acogida entre e polisnan. E tambe a contesta cu e tin cu consulta cu su famia ainda. Pero mirando e relacion den e directiva aki, probablemente e lo no kier sigui den e mesun gang, sino lo mester bin henter un ekipo nobo cu si por funciona cu otro.
Tocante Rodney Solognier
Rodney Solognier mes no ta desconoci den Sindicato di Polis Aruba (SPA). Pa algun aña caba e ta sirbiendo e miembronan den diferente funcion, pero nunca di presidente ainda. Den eleccion di dia 29 di mei 2020, a eligie como vice-presidente, ora cu Omar de Kort a dicidi di no pone su mes reeligibel. Aña pasa e competencia pa vice-presidente tabata entre e y Rolando Maduro, ambos tabata den directiva caba. Den e ultimo eleccion el a gana como presidente.
Rodney Solognier a drenta Cuerpo Policial desde dia 1 di maart 1995, pues a cumpli 26 aña como polis. El a crece den e trabou, te yega e rango di subinspector di polis y ta den funcion di “Chef van Dienst” den e districto di Santa Cruz. E funcion aki ta relativamente nobo y ta encera un version profesionalisa, adapta y cu amplio responsabilidad, compara cu locual antes tabata conoci como un “wachtcommandant”. Den e rol nobo, e polis den e funcion ey ta e hefe di tur e polisnan uniforma riba warda na e momento ey y tin autoridad di un subfiscal.
Tocante Sindicato di Polis
Sindicato di Polis Aruba ta existi desde aña 1986, ora Aruba a bira pais y nos a conta cu nos mesun cuerpo di polis. Prome cu esey Aruba tabata parti di Cuerpo Policial di Antias Hulandes y como tal e polisnan tabata miembro di e sindicato di polis di Antias, NAPB. Nan tin mas o menos 485 miembro di e 600 empleadonan (polis y civil) cu ta traha na Cuerpo Policial di Aruba. E prome presidente di SPA tabata Leslie Merkis sigui pa Isidro “Chido” Maduro qepd., Coizy Krozendijk, Victor Simon qepd, Eric Zaandam qepd, Miguel Maduro, Angelo Davelaar, Edgar Maduro, Jose Dirksz y awendia Rodney Solognier.
