Awe mainta trempan trahadonan di e compania nacional di transporte ARUBUS a dicidi di pone trabou abou pa mustra nan malcontento pa decision tuma door di gerencia pa cu cortamento den nan salario.
Pa 5.30 di mainta na momento cu e busnan mester a cuminsa subi caya, tur a keda staciona na e sede principal na Wayaca. Ta papia aki di Lijndienst, cu ta core ruta, y esnan cu ta busca e studiantenan rond Aruba. Algun mil persona a keda afecta pa e protesta aki cu a tuma luga bou guia di sindicato SEPPA. Pa 7.30 nan a reanuda trabou.
E protesta tin di haber cu e decision di e compania pa corta e salario cu 12.6%. E reduccion den nan entrada ta algo cu e trahadonan a coopera cu ne caba aña pasa, pero e protocol ey a vence dia 31 di december.
Mainta trempan por a topa masha hopi studiante para na caminda, sin forma pa yega nan scol. Riba dje tabatin un yobida cu a causa cu hopi di e studiantenan a haya un muha formal y como cu mayornan ta baha studiantenan banda di caminda pa coy bus, hopi di nan no tabatin forma pa bolbe nan cas, y tampoco pa yega scol. Tin di nan no tabatin minuut pa haci yamada of nan famia tin cu keda sin bay traha pa hiba nan cas cambia paña pa despues bolbe scol. Riba dje tin di nan tabatin test pendiente. “Ami no sa si mi ta logra yega scol awe. Probablemente pa mi bay cas, mi no sa ki ora mi ta haya lift, pa bolbe scol lo mi no logra,” un studiante a comenta.
